‘अॅग्रोवन’च्या कृषी प्रदर्शनामध्ये वसंतराव नाईक मराठवाडा कृषी विद्यापीठाच्या (VNMKV) औरंगाबाद येथील कृषी विज्ञान केंद्र आणि राष्ट्रीय कृषी संशोधन प्रकल्पाची दालने होती. (Agrowon Agricultural Exhibition 2023)

विद्यापीठांनी विकसित केलेली विविध पिके, फळपिकांचे वाण, लागवड, कीड-रोग व्यवस्थापन तंत्रज्ञानाचा प्रसार प्रदर्शनातून झाला. राष्ट्रीय कृषी संशोधन प्रकल्पाचे प्रभारी अधिकारी डॉ. सूर्यकांत पवार, डॉ. दिलीप हिंगोले यांच्या मार्गदर्शनाखाली शेतकऱ्यांना यंदाच्या आंतरराष्ट्रीय तृणधान्य वर्षानिमित्त बाजरी, राळे, भगर, नाचणी आदी तृणधान्यांची माहिती देण्यात आली.

या ठिकाणी विद्यापीठाने विकसित केलेले बाजरीचे विविध वाण उपलब्ध होते. कृषी विज्ञान केंद्राचे समन्वयक डॉ. किशोर झाडे यांच्या मार्गदर्शनाखाली कृषी हवामान विषयविशेषज्ञ डॉ. अशोक निर्वळ, शिवाजी काजळे यांनी मेघदूत तसेच दामिनी अॅप, शेतीपूरक कुक्कुटपालन या बाबत माहिती दिली.