Pune News : उगलेवाडी-फदालेवाडी (ता.आंबेगाव) ग्रामपंचायत, शाश्वत संस्था मंचर, सकाळ रिलिफ फंड व लोकसहभागातून शिंगाडेवाडी येथील सार्वजनिक तळ्याचे खोलीकरणाचे काम पूर्ण झाले आहे. या कामामुळे १३ लाख ५० हजार लिटरने पाणी साठवण क्षमता वाढली आहे. या पाण्याचा लाभ आंबेगाव व राजगुरुनगर तालुक्यांतील ९०० कुटुंबांना होणार आहे.

आंबेगाव व राजगुरुनगर तालुक्यांच्या सीमारेषेवर असलेल्या शिंगाडेवाडी येथे सार्वजनिक तळे आहे. परंतु उन्हाळ्यातील चार महिने या भागात पाण्याची तीव्र टंचाई निर्माण होत होती. त्यामुळे शाश्वत संस्था मंचर व ग्रामपंचायतीने सकाळ रिलिफ फंडापुढे ही समस्या मांडली. त्यानुसार १५ मीटर रुंदी, ४५ मीटर लांबी व २ मीटर उंची याप्रमाणे तळ्यात खोलीकरण करण्यात आले.

या कामामुळे शिंगाडेवाडीमधील ६०० व सुपेवाडीमधील ३०० कुटुंबांचा तसेच जनावरांच्या पाण्याचा प्रश्न मार्गी लागला.

जिल्हा परिषदेच्या माजी सदस्या जनाबाई उगले, सरपंच विनोद उगले, उपसरपंच विलास उगले, शाश्वत संस्थेचे कोषाध्यक्ष अशोक आढाव, ग्रामपंचायत सदस्या मंगल शिंगाडे, बजरंग उगले, किसन भोजने, बंडू गाडेकर आदी उपस्थित होते.