Sangli News : ऊसतोडणी मुकादमांकडून दरवर्षी होणारी कोट्यवधीची फसवणूक, त्यातून देशोधडीला लागणारे ऊस वाहतूकदार, त्यांच्या वाढलेल्या आत्महत्या, हे सत्र थांबले पाहिजे.

त्यासाठी ऊसतोडणी टोळी करार स्व. गोपीनाथ मुंडे महामंडळाच्या माध्यमातून आणि केंद्रीकरण पद्धतीनेच झाले पाहिजेत, या मुख्य मागणीसाठी रविवारी (ता. १६) तरुण भारत क्रीडांगणावर दुपारी २ वाजता ऊसतोडणी वाहतूकदारांचा निर्णायक मेळावा होणार आहे.

स्वाभिमानी ऊसतोडणी वाहतूक संघटनेने या मेळाव्याचे आयोजन केले आहे. संघटनेचे अध्यक्ष राजू शेट्टी आणि संघटना नेते पृथ्वीराज पवार या वेळी निर्णायक आंदोलनाची घोषणा करणार आहेत. शेकडो वाहतूकदार या मेळाव्याला उपस्थित राहतील, अशी माहिती निमंत्रक संदीप राजोबा यांनी दिली.

विश्रामबाग येथील क्रांतिसिंह नाना पाटील यांच्या पुतळ्यापासून दुपारी २ वाजता रॅली निघेल. तेथून तरुण भारत क्रीडांगणावर मेळावा होईल. सुनील शिष्टे, प्रवीण शेट्टी, विनोद पाटील, सुदर्शन माद्वाण्णा, राहुल सकळे आदी नियोजन करत आहेत.

...अशा आहेत मागण्या

- नोंदणीकृत वाहतूकदार, मजूर व मुकादमांशीच कारखान्यांनी करार करावा

- सर्व कारखान्यांचे करार एका नमुन्याचे असावेत

- महाराष्ट्र व कर्नाटकातील कारखाने व सरकारने समन्वय राखून फसवणुकीला अटकाव करावा

- ज्यांनी फसवणूक केली आहे, त्यांच्याविरुद्ध कडक पोलिस कारवाई करावी