मुंबई : केंद्रीय रेशीम (Silk farming) मंडळाने बीज कोषाचे दर प्युपेशन टक्केवारीनुसार वाढविल्याने शेतकऱ्यांच्या बीज कोषांचा दर कमी मिळत आहे, त्यामुळे अंडीपुंज निर्मितीकरिता खरेदी करण्यात येणारी तुती रेशीम बीज दरात सुधारणा करण्याचा निर्णय घेण्यात आला आहे. हा दर ९५० ते एक हजार रुपयांपर्यंत वाढविण्यात येणार आहे.

रेशीम उत्पादक शेतकऱ्यांना गडहिंग्लज (जि. कोल्हापूर) येथील शासकीय अंडीपुंज निर्मिती केंद्रामार्फत अंडीपुंज पुरवठा करण्यात येतो. त्यासाठी बीज कोषांची आवश्यकता असते. त्याकरिता म्हैसूर येथून सीड अंडीपुंज आणून स्थानिक बीज कोष उत्पादक शेतकऱ्यांना पुरवठा करण्यात येतो.

या शेतकऱ्यांनी उत्पादित केलेले बीज कोष गडहिंग्लज येथील केंद्रामार्फत खरेदी केले जातात. त्या कोषांतून अंडीपुंज तयार केले जातात. सध्या रेशीम संचालनालयाने प्युपेशन टक्केवारीनुसार ६०० ते ६५० रुपये प्रतिकिलो दराप्रमाणे शेतकऱ्यांकडून तुती रेशीम बीज कोष खरेदी केली जातात.

प्युपेशन टक्केवारीनुसार दर निश्चित

सध्या स्थानिक शेतकऱ्यांच्या बीज कोषांना मिळणारा दर हा केंद्रीय रेशीम मंडळाच्या दरापेक्षा कमी असल्याने शेतकऱ्यांचे बीज कोषांना मागणी नाही. त्याचा परिणाम अंडीपुंज निर्मितीवर होत आहे. त्यामुळे रेशीम बीज कोष उत्पादक शेतकऱ्यांनी बीज कोषाच्या दरात वाढ करण्याची मागणी केली होती. त्यानुसार ८० प्युपेशन टक्केवारीसाठी ९५० रुपये तर ९६ प्युपेशन टक्केवारीच्या वर एक हजार रुपये दर निश्चित करण्यात आला आहे.