सोलापूर : साहित्यरत्न लोकशाहीर अण्णा भाऊ साठे विकास महामंडळामार्फत राबविण्यात येणाऱ्या थेट कर्ज योजनेअंतर्गत (Loan Scheme) कर्ज मागणी (Loan Demand) अर्ज वितरण २९ नोव्हेंबरपासून सुरू होत असून, कागदपत्रांच्या पूर्ततेसह २० डिसेंबरपर्यंत अर्ज स्वीकारले जाणार आहेत.

तरी मातंग समाज व तत्सम १२ पोट जातीतील इच्छुकांनी विहित मुदतीत अर्ज सादर करावेत, असे आवाहन महामंडळाचे जिल्हा व्यवस्थापक टी. आर. शिंदे यांनी प्रसिद्धिपत्रकाद्वारे केले आहे.

यासंबंधीच्या पत्रकात म्हटले आहे, महामंडळामार्फत राबविण्यात येणाऱ्या थेट कर्ज योजनेअंतर्गत कर्जाची मर्यादा रक्कम एक लाखापर्यंत वाढविण्यात आली आहे. यामध्ये महामंडळाचा हिस्सा ८५ हजार रुपये, अनुदान रक्कम दहा हजार रुपये, अर्जदाराचा सहभाग पाच हजार रुपये असे एकूण एक लाख रुपये कर्ज देण्यात येते. तीन वर्षे (३६ महिने) कालावधीसाठी

दर साल दर शेकडा चार टक्के व्याजदराप्रमाणे कर्ज रक्कम वितरित करण्यात येणार आहे. सदर योजनेसाठी सोलापूर जिल्ह्यासाठी एकूण ६५ लाभार्थींचे ६५ लाखांचे उद्दिष्ट प्राप्त झाले आहे. तरी इच्छुकांनी महामंडळाचे जिल्हा कार्यालय, डॉ. बाबासाहेब आंबेडकर सामाजिक न्याय भवन, सात रस्ता, शासकीय विश्रामगृहाच्या पाठीमागे, बिग बजार समोर, सोलापूर येथे स्वत: प्रत्यक्ष कार्यालयात हजर राहणे बंधनकारक आहे, असे स्पष्ट कऱण्यात आले आहे.