खोपोली ः खोपोलीजवळ ताकई-साजगाव परिसरात कार्तिकी एकादशीपासून जिल्ह्यात प्रसिद्ध असलेली बोंबल्या विठोबाची यात्रा सुरू आहे. पंधरा दिवस चालणारी कोकण (kokan) विभागातील ही एकमेव मोठी यात्रा आहे. धाकटी पंढरी अशी ओळख असलेल्या यात्रेत सध्‍या भाविकांची गर्दी वाढली आहे.

येथील सुक्‍या मासळीचा बाजार (Fish Market) कोकणातच नव्हे तर संपूर्ण राज्‍यात प्रसिद्ध असून दररोज लाखोंची उलाढाल होते. यंदा गतवर्षीपेक्षा तुलनेत दर १० ते १५ टक्‍यांनी वाढल्‍याचे व्यापारी सांगतात.

साजगावच्या यात्रेला पंचक्रोशीत अनन्‍यसाधारण महत्त्‍व आहे. संत तुकारामच्या येथील वास्तव्याशी व त्याकाळी घडलेल्या काही घटनाक्रमांशी या यात्रेचा संबंध असल्याचे जुने-जाणते सांगतात. यात्रेत यंदा सुक्‍या मासळीची ५० हून अधिक दुकाने लावण्यात आली असून मिठाईची दुकानेही तेवढीच आहेत.

केवळ सुक्‍या मासळीच्या खरेदीसाठी संपूर्ण खालापूर तालुक्‍यासह पेण, कर्जत, अलिबाग, पनवेल, ठाणे, पुण्यातील खवय्ये आवर्जून गर्दी करतात. यात्रेत बोंबील, सुकट, सोडे, दांडी सुकट, मांदेली, ढोमे, अंबाडी सुकट, आकडी सुकट, बांगडे, सुरमई, माकली अशा विविध प्रकारची सुकी मासळी विक्रीसाठी उपलब्ध आहे.

पनवेल, अलिबाग, पेण, पाली-सुधागड या भागातील कोळी बांधव यात्रेत सुकी मासळीचा व्यवसाय करण्यासाठी दरवर्षी नित्याने येतात. मुंबई येथील मरोळ व रायगडमधील पोयनाड, मुरूड, अलिबाग येथील सुकी मासळीलाही यात्रेत विशेष मागणी असते.

फक्त सुक्‍या मासळीच्या विक्रीतून येथे दररोज लाखोंचे आर्थिक व्यवहार होतात. आठवडाअखेर, शनिवार-रविवारी यात्रेत रंगत वाढणाची शक्‍यता आहे. अनेक व्यावसायिकांची तिसरी व चौथी पिढी याठिकाणी व्यवसाय करताना दिसते.