अकोला ः ‘‘या हंगामात कांदा बीजोत्पादनात (Onion Seed Production) अधिकाधिक उत्पादनासाठी लागवड तंत्र (Cultivation Technique) महत्त्वाचे आहे,’’ असे मत डॉ. पंजाबराव देशमुख कृषी विद्यापीठाच्या भाजीपाला संशोधन केंद्रातील कनिष्ठ पैदासकार डॉ. श्‍याम घावडे यांनी व्यक्त केले.

बार्शीटाकळी तालुक्यातील मौजे चिंचोली (रुद्रायणी) येथे कृषी तंत्रज्ञान व्यवस्थापन यंत्रणा (आत्मा) व कृषी विभागामार्फत प्रकल्प संचालक आरिफ शहा यांच्या मार्गदर्शनात कांदा बीजोत्पादक शेतकऱ्यांची शेतीशाळा घेण्यात आली.

डॉ. घावडे यांनी कांदा बीजोत्पादन तसेच बियांपासून कांदा उत्पादन या दोन्ही बाबतीत विद्यापीठाचे तंत्रज्ञान, शिफारशी, लागवड पद्धती, जाती, विलगीकरण, पूर्वमशागत, कांदा बीजोत्पादन लागवड तंत्र, उत्पादनवाढ तंत्र, पाणी व्यवस्थापन व खत व्यवस्थापनाबाबत सविस्तरपणे तांत्रिक मार्गदर्शन केले. डॉ. दिनेश फड यांनी बीज प्रक्रिया, कीड व रोग व्यवस्थापनाबाबत सविस्तरपणे मार्गदर्शन केले

तालुका कृषी अधिकारी विलास वाशिमकर यांनी कृषी विभागामार्फत राबविण्यात येणाऱ्या विविध योजनांविषयी माहिती दिली. ‘‘पंतप्रधान उन्नयन योजनेचा शेतकऱ्यांनी लाभ घ्यावा,’’ असे आवाहन त्यांनी केले. आत्मा यंत्रणेच्या सहाय्यक तंत्र व्यवस्थापक अर्चना पेठे यांनी शेतीशाळेचे नियोजन केले. कांदा बीजोत्पादक शेतीशाळा यशस्वी होण्यासाठी कृषिमित्र रोशन वाघ यांनी पुढाकार घेतला.