अॅग्रोवन वृत्तसेवा
जळगाव ः खानदेशात कापूस दर (Cotton Rate) दबावातच आहेत. सध्या प्रति क्विंटल ७५०० ते ७८०० रुपये दर खेडा खरेदी (थेट गावातून किंवा जागेवरची खरेदी) मध्ये शेतकऱ्यांना मिळत आहे.
मागील काही दिवसांत कापूस दर आणखी दबावात आले आहेत. शेतकऱ्यांना दरवाढीची प्रतीक्षा आहे. खानदेशात कापसाची आवकही (Cotton Arrival) स्थिर आहे.

सध्या प्रतिदिन पाच हजार गाठी (एक गाठ १७० किलो रुई) कापसाची आवक होत आहे. अर्थात रोज २५ हजार क्विंटल कापसाची आवक होत आहे. ही आवक वाढत नसल्याची स्थिती आहे. कारण दर परवडणारे नाहीत.

शेतकऱ्यांना किमान १० हजार रुपये दर हवा आहे. दरवाढ डिसेंबरनंतर झालेलीच नाही. दरात घसरण अधिक झाली आहे. नोव्हेंबरमध्ये ८००० ते ८५०० रुपये प्रति क्विंटलचा दर काही दिवस होता. जानेवारीतील दर कमाल ८२५० रुपये प्रति क्विंटल होता.

फेब्रुवारी व मार्च या महिन्यातील दर कमाल ८००० रुपये असाच राहिला आहे. किमान दर ७७०० रुपयांवरून ७५०० रुपये प्रति क्विंटल झाले आहेत.

दर्जेदार कापूस शेतकऱ्यांकडे आहे. खानदेशातील काही प्रमुख जिनिंग प्रेसिंग कारखाने सुरू आहेत. त्यात रोज कमाल २०० गाठींची निर्मिती होत आहे.

ही निर्मिती पुढे वाढू शकते. कारण होळी सणानंतर कापूस प्रक्रिया उद्योग गती घेतो. सध्या खरेदीदारांना कापूस उपलब्ध होत असल्याने प्रक्रियादेखील वेग घेईल, असे संकेत आहेत.

धुळे व नंदुरबारात गुजरातमधील खरेदीदारांचे एजंट सक्रिय आहेत. काही शेतकरी मध्य प्रदेशातील बडवानी येथेही कापसाची विक्री करीत आहेत.