सिंधुदुर्गनगरी ः जिल्ह्यातील नाटळ (ता. कणकवली) नदीवर कोकण पद्धतीचा पहिला बंधारा (Konkan Type Bund) उभारण्यात आला आहे. दोन कोटी लिटर पाण्याची क्षमता (Water Capacity) असलेला हा बंधारा जलसमृद्ध कोकण प्रतिष्ठान, दिगंत स्वराज्य फाउंडेशन आणि ग्रामविकास मंडळाच्या माध्यमातून बांधण्यात आला आहे.

जिल्ह्यात शासनाच्या विविध संस्था या कोल्हापूर पद्धतीचे बंधारे बांधतात. दोन्ही जिल्ह्याची भौगोलिक रचना, पावसाचे प्रमाण वेगवेगळे असल्यामुळे बंधाऱ्यांमध्ये तांत्रिक दोष निर्माण झाल्याची अनेक उदाहरणे आहेत. त्यामुळे कोकणात पडणाऱ्या पावसाचा अंदाज, नदीचे पाणी वाहण्याची गती याचा विचार करून या नद्यांवर बंधारे उभारण्यात यावे अशी येथील लोकांची मागणी होती.

परंतु त्यादृष्टीने शासनपातळीवरून कोणतीही अंमलबजावणी झालेली नाही. मात्र जलसमृद्ध कोकण प्रतिष्ठान, दिगंत स्वराज्य फाउंडेशन आणि नाटळ ग्रामविकास मंडळाच्या माध्यमातून नाटळ नदीवर कोकणातील पहिला कोकण पद्धतीचा बंधारा उभारण्यात आला आहे.

राज्याचे माजी मुख्य सचिव द. म. सुकथनकर, कोकण भूमी प्रतिष्ठानचे अध्यक्ष जलनायक संजय यादवराव, दिगंत स्वराज्य फाउंडेशनचे अध्यक्ष जलनायक राहुल तिवरेकर आणि जलसमृद्धी अभियानप्रमुख विश्वनाथ सावंत यांच्या माध्यमातून कोकणातील बंधाऱ्यांचे स्वतंत्र डिझाईन तयार करण्यात आले आहे.