पुणे : उत्तरेकडील थंडीने (Cold) महाराष्ट्रावर स्वारी केल्याने राज्यात हुडहुडी कायम आहे. उत्तर महाराष्ट्रातील निफाड येथील गहू संशोधन केंद्रात (Wheat Research Center) राज्याचे हंगामातील नीचांकी ५ अंश सेल्सिअस तापमानाची नोंद झाली आहे. आज (ता. ११) राज्यात वाढलेला गारठा (Cold Weather) कायम राहण्याचा अंदाज हवामान विभागाने (Weather Department) वर्तविली आहे.

उत्तरेकडील थंड वारे महाराष्ट्राकडे आल्याने उत्तर महाराष्ट्रासह, मराठवाडा, विदर्भात थंडीची लाट कायम आहे. किमान तापमानात चढ-उतार सुरू असले तरी, मंगळवारी (ता. १०) अनेक ठिकाणी किमान तापमानाचा पारा १० अंशांच्या खालीच होता. तर कोकण वगळता जवळपास सर्वच ठिकाणी किमान तापमान १४ अंशांच्या खाली होते.

एकामागोमाग येणाऱ्या पश्चिमी चक्रावतांमुळे हिमालय पर्वत आणि लगतच्या भागात हिमवृष्टी सुरूच आहे. उत्तर भारतात थंडीची लाट कमी-अधिक होत आहे. मंगळवारी (ता. १०) राजस्थानातील चुरू येथे देशाच्या सपाट भूभागावरील नीचांकी १.५ अंश सेल्सिअस तापमानाची नोंद झाली.

आज (ता. ११) थंडीची लाट काहीशी ओसरण्याची शक्यता असली तरी गारठा टिकून राहणार आहे. तर उत्तर प्रदेश, बिहार, आसाम, त्रिपुरा राज्यात दाट धुके पडण्याचा अंदाज आहे.

मंगळवारी (ता. १०) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) : पुणे २९.१ (७.४), जळगाव ३३.२ (५.३), धुळे २८.० (५.५), कोल्हापूर २९.१ (१४.२), महाबळेश्वर २६.६(१२.१), नाशिक २८.१ (७.६), निफाड २८.२ (५.०), सांगली ३०.२ (१२.२), सातारा ३०.२(१०.०), सोलापूर ३२.२ (१३.४), सांताक्रूझ ३२.१ (१७.०),

डहाणू ३०.१ (१६.२), रत्नागिरी ३४.० (१५.८), औरंगाबाद २९.२ (७.७), नांदेड २७.६ (१०.६), परभणी २९.५ (१०.०), अकोला ३०.९ (१०.५), अमरावती ३०.० (११.३), बुलडाणा २८.४ (११.०), ब्रह्मपुरी ३१.१ (११.४), चंद्रपूर २७.६ (१०.८), गडचिरोली २९.०(९.२), गोंदिया २९.०(८.६), नागपूर २९.६ (९.२), वर्धा ३०.०(१०.४), यवतमाळ २९.५ (९.५).