पुणे : राज्यात बहुतांश ठिकाणी किमान तापमान (Minimum Temperature) १८ अंशांखाली आल्याने पहाटे गारठा (Cold Weather) वाढू लागला आहे. कमाल तापमानात (Maximum Temperature) चढ-उतार सुरू असून, दुपारी उन्हाचा चटका (Heat) कायम आहे.

रविवारी (ता. ३०) सकाळपर्यंतच्या २४ तासांमध्ये निफाड येथील गहू संशोधन केंद्रात राज्यातील निचांकी १२.२ अंश सेल्सिअस तापमानाची नोंद झाली. आज (ता. ३१) राज्यात हवामान कोरडे राहण्याचा अंदाज हवामान विभागाने वर्तविला आहे.

नैर्ऋत्य बंगालच्या उपसागरात दक्षिण श्रीलंकेच्या किनाऱ्यालगत समुद्र सपाटीपासून ३.६ किलोमीटर उंचीवर चक्राकार वारे वाहत आहेत. तर ईशान्येकडील वारे सक्रिय झाल्याने रविवारी (ता. ३०) दक्षिण भारतात ईशान्य मोसमी वारे (ईशान्य मॉन्सून) सर्वदूर पोचल्याचे हवामान विभागाने जाहीर केले आहे.

उत्तरेकडून वाहणारे थंड व कोरडे वारे पोषक ठरल्याने राज्यात गारठा वाढू लागला आहे. निरभ्र आकाशामुळे स्वच्छ सूर्यप्रकाश जमिनीवर येऊन दुपारी उन्हाची ताप वाढली आहे. रविवारी (ता. ३०) सकाळपर्यंतच्या २४ तासांमध्ये कोकण वगळता राज्यात बहुतांशी ठिकाणी किमान तापमान १८ अंशांच्या खाली होते. तर कमाल तापमान २९ ते ३५ अंशांच्या दरम्यान स्थिरावले आहे.

रविवारी (ता. ३०) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे ३०.३ (१२.६), जळगाव ३३.८(१४.०), कोल्हापूर २९.७ (१७.७), महाबळेश्वर २५.७(१३.८), नाशिक २९.० (१३.३), निफाड ३०.२ (१२.२), सांगली ३१.६(१७.२), सातारा ३०.०(१४.३), सोलापूर ३२.८ (१६.१), सांताक्रूझ ३४.४(२०.५), डहाणू ३४.७ (२०.३), रत्नागिरी ३४.५ (२२.२), औरंगाबाद ३०.२ (१३.०), नांदेड ३१.८ (१६.४), उस्मानाबाद - (१५.२), परभणी ३०.९ (१५.४), अकोला ३३.७ (१७.८), अमरावती ३३.६ (१५.५), ब्रह्मपूरी ३३.२ (१७.१), बुलढाणा ३०.७ (१६.६), चंद्रपूर ३१.२ (१७.४), गडचिरोली ३१.६(१६.२), गोंदिया ३०.८(१७.०), नागपूर ३२.२ (१६.८), वर्धा ३२.२(१६.६), यवतमाळ ३२.५ (१५.०).