फलटण (जि. सातारा) ः गोविंद डेअरीच्या (Govind dairy) सभासदांना सिस्टिमा बायो कंपनीने (Systema Bio Company) बनविलेल्या बायोगॅस संयंत्रासोबत (Bio Gas Plant) दोन बर्नरची उत्कृष्ट शेगडी, स्वयंपाकासाठी गॅस आणि दर्जेदार सेंद्रिय खत (Organic Fertilizer) उपलब्ध होणार आहे. डेअरीने राबविलेल्या विशेष योजनेमध्ये हे संयंत्र बसविण्यासाठी पाच हजार रुपये खर्च आहे, अशी माहिती गोविंद मिल्क अँड मिल्क प्रॉडक्ट्सचे चेअरमन श्रीमंत संजीवराजे नाईक निंबाळकर यांनी दिली.

मानेवाडी (ता. फलटण) येथे गोविंद मिल्क अँड मिल्क प्रॉडक्ट्स प्रायव्हेट लिमिटेड आणि सिस्टिमा बायो यांच्या संयुक्त सहभागाने आयोजित ग्रीन गोविंद बायोगॅस संयंत्र पुरवठा योजनेच्या शुभारंभप्रसंगी श्रीमंत संजीवराजे नाईक निंबाळकर यांनी शेतकऱ्यांना मार्गदर्शन केले. या वेळी सिस्टिमा बायोच्या डायरेक्टर जुनाक्षी क्रूज, सिस्टिमा बायोच्या पीपल हेड डायरेक्टर सेसील पॉम्पी, कमर्शिअल डायरेक्टर अतुल मित्तल, गोविंदचे व्यवस्थापकीय संचालक धरमिंदर भल्ला, गोविंदचे संचालक श्रीमंत सत्यजितराजे नाईक निंबाळकर आणि चंद्रशेखर जगताप यांच्यासह परिसरातील शेतकरी उपस्थित होते.

अतुल मित्तल यांनी ग्रीन गोविंद बायोगॅस संयंत्र पुरवठा योजनेचे स्वरूप आणि विविध फायद्याबाबत माहिती दिली. गोविंद डेअरी आणि कंपनीमध्ये झालेल्या करारामुळे हे बायोगॅस संयंत्र सभासदांना दोन बर्नर शेगडीसह पाच हजार रुपयांत उपलब्ध करून देण्यात आले आहे. गोविंद फाउंडेशनचे डॉ. शांताराम गायकवाड यांनी मान्यवरांचे स्वागत करून शेतकऱ्यांना डेअरीच्या उपक्रमाबाबत सविस्तर माहिती दिली.