जळगाव ः खानदेशात जळगाव, धुळे व नंदुरबारातील सर्वच बाजार समित्यांची निवडणूक (APMC Election) होणार आहे. शासनाने आदेश जारी केल्याने सुमारे दीड वर्षे रखडलेल्या निवडणुका पार पडतील. यातच शेतकऱ्यांना मतदानाचा अधिकार (Voting Right To Farmer) असल्याने निवडणुकीत रंग भरेल, चुरस वाढेल, असेही दिसत आहे.

जळगाव जिल्ह्यात जळगाव, चोपडा, भुसावळ, मुक्ताईनगर, यावल, रावेर, जामनेर, अमळनेर, पारोळा, पाचोरा, धरणगाव, धुळे जिल्ह्यातील धुळे, साक्री, शिरपूर आणि दोंडाईचा (ता. शिंदखेडा) येथील बाजार समित्यांचाही निवडणूक प्रक्रियेत सहभाग आहे. तसेच नंदुरबारातील नंदुरबार, शहादा, तळोदा, नवापूर या बाजार समित्यांतही निवडणूक होईल.

बाजार समित्यांवर काही महिन्यांपासून प्रशासक मंडळाची नियुक्ती झाली होती. अनेक बाजार समित्यांत सर्व पक्षीय पॅनेल सत्तेत होते. तर काही भागांत दोन्ही काँग्रेसचे वर्चस्व होते. मध्यंतरी विविध पक्षांच्या पदाधिकाऱ्यांनी प्रशासक मंडळावर वर्णी लावून घेतली होती. पण निवडणूक जाहीर झाल्याने बाजार समित्यांसाठी चुरशीच्या लढती होतील. कारण शेतकऱ्यांना मतदानाचा अधिकार आहे. उमेदवारांना यापूर्वी विविध कार्यकारी सहकारी सोसायट्या व ग्रामपंचायतींच्या सदस्यांचे मतदान मिळवावे लागत होते. परंतु आता सोसायट्या व पंचायतींसोबत शेतकऱ्यांचेही मतदान मिळवावे लागेल. यामुळे घरोघरी संपर्क वाढवावा लागेल. विधानसभेच्या निवडणुकीचे स्वरूपच जणू या निवडणुकीला येईल, असे दिसत आहे. यातच मतदारांची संख्या वाढल्याने अनेक प्रस्थापित उमेदवार, नेत्यांची सद्दीही संपुष्टात येईल.

आजी-माजी संचालक लागले तयारीला...

बाजार समितीच्या निवडणुका जाहीर झाल्याने आजी माजी संचालक तयारी करू लागले आहेत. आता थेट शेतकऱ्यांमध्ये जावे लागणार असल्याने शेतकऱ्यांशी संपर्क वाढविण्याचा कार्यक्रम अनेकांनी आखला आहे. पीकविमा, पीक नोंदणी, खराब शेतरस्ते, पंचनामे, पिकांवरील रोगराई याबाबत इच्छुक मंडळी अजेंडा हाती घेऊन कामाला लागल्याचे चित्र