Banana Cultivation News : करमाळा तालुक्यातील उजनी लाभक्षेत्रासह माढा, माळशिरस, पंढरपूर, इंदापूर (जि. पुणे) येथे केळी लागवडीकडे शेतकरी मोठ्या प्रमाणात वळला आहे.

कारखान्यांचा गाळप हंगाम (Sugarcane Crushing Season) सुरू झाल्यानंतर ऊस गाळपास पाठवून जमिनीची मशागत करून केळी लावण्यासाठी (Banana Cultivation) शेतकऱ्यांनी जमीन तयार केली आहे.

परंतु, रोपांच्या मागणीत वाढ झाल्याने नामांकित कंपन्यांच्या रोपांमध्ये तुटवडा निर्माण झाला. त्यामुळे शेतकऱ्यांना केळीची रोपे मिळत नसल्याचे चित्र आहे.

सध्या सोलापूर जिल्ह्यात केळीच्या रोपांचा मोठ्या प्रमाणावर तुटवडा आहे. ही गोष्ट लक्षात घेऊन काही नामांकित कंपन्यांच्या अधिकृत विक्रेत्यांकडून १६ रुपयांचे रोप २५ रुपये इतक्या चढ्या दराने विकले जात आहे.

तर नामांकित रोपवाटिकेतील रोपांच्या नावाखाली विक्रेते इतर स्थानिक रोपवाटिकेतील रोपांची विक्री करत आहेत. अशा स्थानिक रोपवाटिकेतील रोपांची निर्मिती करताना विशेष काळजी न घेतल्याने केळी बागा लवकर रोगास बळी पडतात.

परिणामी मालाचा दर्जाही राखला जात नाही. एका बाजूला केळीला उच्चांकी दर मिळत असताना रोप विक्रेत्यांकडून होत असलेल्या पिळवणुकीमुळे शेतकऱ्यांमधून संताप व्यक्त केला जात आहे. अशा लोकांवर कारवाईची मागणी होत आहे.

चांगले व्यवस्थापन केल्यास मुबलक उत्पन्न

केळी पिकाला वर्षभर समाधानकारक दर मिळत असल्याने शेतकऱ्यांनी आता ऊस पिकाला फाटा देऊन केळी पिकाकडे आपला मोर्चा वळविला आहे. केळी उत्पादनातून शेतकऱ्यांना मोठा आर्थिक हातभार मिळत आहे.

परिणामी, उजनी लाभक्षेत्र परिसरात केळी पिकाचे क्षेत्र मोठ्या प्रमाणावर वाढत आहे. केळी बागेचे खत व पाणी व्यवस्थापन चांगले केल्यास पिकातून चांगले उत्पन्न मिळते. त्यामुळे शेतकऱ्यांना आर्थिक मदत होते.