अमूल आणि इतर पाच सहकारी संस्थांचे (Co-operative Societies) विलीनीकरण करून बहुराज्यीय सहकारी संस्था ((MSCS) तयार करण्याची प्रक्रिया सुरू करण्यात आल्याची माहिती सहकार मंत्री अमित शाह (Amit Shaha) यांनी रविवारी दिली आहे. 

केंद्रीय गृह आणि सहकार मंत्री अमित शाह यांच्या अध्यक्षतेखाली आसामच्या गुवाहाटी इथं ईशान्य भारत परिषदेच्या 70 व्या पूर्णसत्राची बैठक झाली. यावेळी ते बोलत होते.

यावेळी शाह म्हणाले, नैसर्गिक शेती आणि डिजिटल शेती ही पंतप्रधान नरेंद्र मोदी यांच्या नेतृत्वाखाली भारत सरकारसाठी प्राधान्याची बाब आहे. नैसर्गिक उत्पादनांच्या  प्रमाणीकरणासाठी अमूल आणि इतर पाच सहकारी संस्थांचे विलीनीकरण करून बहुराज्यीय सहकारी संस्था तयार करण्याची प्रक्रिया सुरू आहे अशी माहिती त्यांनी दिली.

बहुराज्यीय सहकारी संस्था प्रमाणीकरण करून उत्पादनांची निर्यात सुनिश्चित करेल जेणेकरून त्याचा नफा थेट शेतकऱ्यांच्या बँक खात्यात जमा होईल. गुजरात कोऑपरेटिव्ह मिल्क मार्केटिंग फेडरेशन लिमिटेड अमूल ब्रँड अंतर्गत आपली उत्पादने बाजारात आणेल.

शुक्रवारी गंगटोकमध्ये भरलेल्या नॉर्थ-ईस्टर्न कोऑपरेटिव्ह डेअरी कॉन्क्लेव्हमध्ये शाह म्हणाले की, फक्त देशांतर्गत मागणी पूर्ण करायची आहे म्हणून नाही तर शेजारच्या देशांमधील दुधाची बाजारपेठ मिळवण्यासाठी पुढच्या पाच वर्षात देशातील दुधाचं उत्पादन दुपटीने वाढविण्यावर आपण भर दिला पाहिजे.