पुणे : खेड तालुक्यातील भामा आसखेड धरणग्रस्तांना जमीन मोबदल्या ऐवजी भरपाईचे आर्थिक अनुदान देण्यात आले. खेड उपविभागीय कार्यालयात प्रांत विक्रांत चव्हाण यांच्या उपस्थितीत ही भरपाईची रक्कम देण्यात आली. एकूण ४९ प्रकल्पग्रस्तांपैकी १० प्रकल्पग्रस्तांना १ कोटी ३२ लाख रुपयांचे वितरण करण्यात आले.

भामा आसखेड धरणग्रस्तांना पुनर्वसनाच्या मोबदल्याच्या वितरणासाठी सुमारे ९० प्रकल्पग्रस्तांची प्रकरणे या कॅम्पमध्ये निवडण्यासाठी ठेवण्यात आली होती. ७ प्रकल्पग्रस्तांना कागदपत्रांची पुरवण्या केल्यानंतर ३६ लाखांचे अनुदान दिले जाईल. पाच प्रकल्पग्रस्तांनी वाढीव अनुदानाची मागणी केली. भामा आसखेड धरणग्रस्तांचा प्रश्न गेली तीन दशके प्रलंबित पडला होता. अखेर सर्वोच्च न्यायालयात जाऊन न्याय मागण्याची वेळ प्रकल्पग्रस्तांवर आली. ३८८ खातेदारांना पर्यायी जमीन देण्याचे आदेश देण्यात आले होते. तर १६० प्रकल्पग्रस्त ६५ टक्के रक्कम भरून पुनर्वसन करण्यासाठी जमीन मिळावी म्हणून उच्च न्यायालयात गेले होते.

आतापर्यंत ३४२ जण अपात्र :

आतापर्यंत ७७३ प्रकल्पग्रस्तांना ८८ कोटी २३ लाख ९५ हजार ९२६ रुपये अनुदान देण्यात आले. खास बाब अनुदानासाठी ३४२ अर्जदार अपात्र ठरले. रस्ता आणि वसाहतीसाठी संपादित क्षेत्र असलेले ३६ अर्जदार, हरकतींवर निकाली काढण्यात आलेले २९ अर्जदार असे एकूण ३४२ धरणग्रस्त अपात्र ठरविले गेले.