अकोला ः जिल्ह्यात खारपाणपट्ट्यात शेतकऱ्यांना सिंचनाची (Irrigation) सोय निर्माण करण्याच्या उद्देशाने उभारल्या जात असलेल्या नेरधामना पूर्णा बरेज (Purna Barrage) नं. २ व काटीपाटी बॅरेजचे अपूर्ण असलेले काम तातडीने केले जावे.

अन्यथा जनआंदोलन उभारण्याचा इशारा अकोला जिल्हा जलसिंचन संघर्ष समितीचे अध्यक्ष महादेवराव भुईभार यांनी बुधवारी (ता. ७) पत्रकार परिषदेत ही माहिती दिली. श्री. भुईभार पुढे म्हणाले, की नेरधामना पूर्णा बॅरेज नंबर २ व काटीपाटी बॅरेजचे काम मागील १० वर्षांपासून सुरू आहे.

हे काम सुरू करून पूर्ण करण्याचे आश्वासन तत्कालिन मुख्यमंत्री व आताचे उपमुख्यमंत्री तसेच जिल्ह्याचे पालकमंत्री देवेंद्र फडणवीस यांनी गांधीग्राम येथे आले असताना दिले होते. बॅरेजलासुद्धा त्यांनी भेट दिली होती.

परंतु, त्यालाही आता पाच वर्षे लोटली. याबाबत मुख्यमंत्री व राज्यपालांना जलसिंचन संघर्ष समितीच्या वतीने वारंवार निवेदने देण्यात आली.

हिवाळी अधिवेशनात तारीख जाहीर न केल्यास जनआंदोलन करण्यात येईल, असा इशारा भुईभार यांनी दिला. या वेळी पत्रकार परिषदेला समितीचे उपाध्यक्ष तथा बाजार समितीचे माजी सभापती शिरीष धोत्रे व इतर सदस्य उपस्थित होते.