पुणे : आंबेगाव तालुक्याच्या पश्‍चिम आदिवासी पट्ट्यात तळेघर, पाटण, जांभोरी, पोखरी, शिवरामध्ये सध्या भात पीक काढणीला (Paddy Harvesting) वेग आला. ‘डोंगरी शेत माझें’ या उक्तीप्रमाणे सर्व जण कामात व्यस्त असतानाचे चित्र पाहावयास मिळते.

आदिवासी शेतकऱ्यांच्या भातशेती हे उदरनिर्वाहाचे एकमेव साधन आहे. दर वर्षीपेक्षा यंदा चांगला पाऊस झाल्याने आदिवासी भागात घेतले जाणारे भात पीक यंदा चांगल्या प्रकारे आल्याने तालुक्यातील आदिवासी शेतकऱ्यांची दिवाळी आनंदात गेली.

तालुक्यात ५ हजार ५०० हेक्टर एवढे एकूण भातक्षेत्र आहे. या ठिकाणी पडणाऱ्या पावसावर येथील आदिवासी आपली रोजी रोटी भरण्यासाठी पावसाच्या पाण्याची प्रतीक्षा करतात. या वर्षी चांगला पाऊस पडल्याने भात पिकाला जीवदान मिळाले आहे. आंबेगाव तालुक्याचा पश्‍चिम पट्टा प्रामुख्याने भात पिकासाठी प्रसिद्ध आहे.

डोंगर माथ्यावरून येणारे पावसाचे पाणी भात पिकांसाठी महत्त्वाचे ठरते. या ठिकाणी दरवर्षी १०० मिलिमीटरपेक्षा जास्त पाऊस पडतो. या ठिकाणचा आदिवासी बांधव भात पिकाबरोबर नाचणी, वरई, राळे, तसेच भात पिकांच्या वेगवेगळ्या प्रजातींचे पीक घेतो. यामध्ये तांबडा रायभोग, खडके, इंद्रायणी, आंबेमोहोर, बासमती आदी प्रकार येतात. सध्या सर्वत्र भात पिके काढण्याची लगबग सुरू आहे. शेताच्या बांधावर खळे करून दोन-तीन शेतकरी एकत्र येऊन भात पिकाची झोडणी करून भाताची साळ जमवत आहेत.