बुलडाणा ः शासनाने ३४ रुपये दर निश्‍चित केल्याचे एकीकडे स्वागत असले, तरी या जिल्ह्यात मात्र दुग्ध व्यावसायिकांना सरासरी ३ रुपयांचा फटका बसतो आहे. जिल्ह्यात खासगी डेअरींकडून किमान दर ३६ ते ३७ रुपयांपर्यंत प्रतिलिटर मिळत होता. शासनाने घोषणा केल्यानंतर या खरेदीदारांनी ३४ रुपयांचा दर देणे सुरू केले.

जिल्ह्यात दूध संघ डबघाईस आल्याने दुग्धोत्पादन करणाऱ्यांना खासगी डेअरींच्या खरेदीवर अवलंबून राहावे लागते आहे. जिल्ह्यात दररोज वेगवेगळ्या डेअरींकडून हजारो लिटर दुधाची खरेदी केली जाते. विविध डेअरींनी स्थानिक भागात संकलन केंद्र उघडले असून, त्या माध्यमातून खरेदी सुरू आहे. जिल्हा संघ डबघाईस आल्यापासून जिल्ह्यातील पशुपालकांना खासगी डेअरींचा आधार अधिक आहे. या डेअरींची वाहने तालुक्यांमध्ये फिरून संकलन करीत असतात. जिल्ह्यात सुमारे दीड लाख लिटरपर्यंत हे संकलन होत असल्याचे सांगितले जाते. डेअरींमध्ये खरेदीची स्पर्धा तयार झालेली आहे. त्यामुळे दुधाला किमान ३६ ते ३७ रुपयांपर्यंत दर मिळत होता. आता ३४ रुपये निश्‍चित केल्यानंतर तातडीने त्याची या डेअरींकडून अंमलबजावणी सुरू झाली आहे.

शासनाने दुधाचा ३४ रुपये दर निश्चित केला असला तरी त्याचा फायदा कमी, उलट आम्हाला तोटा होतो आहे. कारण यापूर्वी आम्हाला ३७ रुपयांपर्यंत दर मिळायचा. दर निश्चित केल्यामुळे डेअरी चालकांनी आता तोच दर देणे सुरू केले आहे.सकाळ-संध्याकाळ मिळून ९० लिटरचा पुरवठा डेअरीला करतो. त्यामुळे प्रति लिटर तीन रुपयांप्रमाणे दररोजचे नुकसान होत आहे. दुसरीकडे पशुखाद्याचे दरही वाढत असल्याने उत्पादन खर्चात मोठी वाढ झाली आहे.

- सदाशिव साबे, रा. आडविहीर, जि.बुलडाणा