नंदुरबार : महाराष्ट्र सुवर्ण जयंती नगरोत्थान महाभियान योजनेअंतर्गत (Nagarothan Mahabhiyan Yojna) धडगाव-वडफळया-रोषमाळ बु. नगर पंचायतीच्या ३८.२३ कोटींची पाणीपुरवठा योजनेला मुख्यमंत्री एकनाथ शिंदे, (Eknath Shinde) उपमुख्यमंत्री देवेंद्र फडणवीस (Devendra Phadnvis) यांनी मंजुरी दिली आहे.

गेल्या डिसेंबर महिन्यात धडगाव-वडफळया- रोषमाळ बु. नगर पंचायतीची निवडणुकीवेळी बाळासाहेबांची शिवसेना नेते तथा माजी आमदार चंद्रकांत रघुवंशी यांनी पाणीपुरवठा योजनेबाबत आश्‍वासन दिले होते. या आश्‍वासनाची पूर्तता त्यांनी केली असून, धडगाव शहरासाठी ३८.२३ कोटी रुपयांची पाणीपुरवठा योजना मंजूर करून आणली आहे.

पाणीपुरवठा योजना महाराष्ट्र सुवर्ण जयंती नगरोत्थान महाभियान या योजनेअंतर्गत करण्यात येणार आहे. या योजनेमुळे धडगावकरांना शुद्ध पाणी मिळणार असल्याने जिल्हा परिषद सदस्य विजयसिंग पराडके, रवींद्र पराडके, गणेश पराडके नगराध्यक्ष धनसिंग पावरा, उपनगराध्यक्ष राजेंद्र पावरा यांनी समाधान व्यक्त केले आहे.