Hingoli News : यंदाच्या (२०२३) जून व जुलै महिन्यातील अतिवृष्टीमुळे हिंगोली जिल्ह्यातील ४ तालुक्यांतील २७ हजार ७४२ शेतकऱ्यांच्या १६ हजार ५९९ हेक्टरवरील पिकांचे ३३ टक्के पेक्षा अधिक नुकसान झाले आहे. बाधित शेतकऱ्यांच्या मदतीसाठी अपेक्षित १४ कोटी ५४ लाख २८ हजार २०० रुपये एवढ्या निधीची मागणी जिल्हा प्रशासनाने केली आहे.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

जून,जुलै महिन्यात कळमनुरी, वसमत, औंढा नागनाथ, सेनगाव या चार तालुक्यांतील अनेक मंडलात अतिवृष्टी झाली. ओढे, नाले, नद्यांच्या पुरांचे पाण्यात पिके बुडाली. जमिनी खरडून गेल्या. या चार तालुक्यांतील पेरणी केलेल्या ४२ हजार २३४ हेक्टर पैकी जिरायती क्षेत्रातील १६ हजार ८९ हेक्टर, बागायती क्षेत्रातील ५१० हेक्टर असे मिळून एकूण १६ हजार ५९९ हेक्टरवरील पिकांचे ३३ टक्के पेक्षा जास्त नुकसान झाले असल्याचे स्पष्ट झाले आहे.

जिरायती क्षेत्रातील पिकनुकसानीबद्दल प्रतिहेक्टरी ८ हजार ५०० रुपयानुसार एकूण १३ कोटी ६७ लाख ५८ हजार २०० रुपये व बागायती क्षेत्रातील पीकनुकसानीबद्दल प्रतिहेक्टरी १७ हजार रुपयेनुसार एकूण ८६ लाख ७० हजार रुपये असा एकूण १४ कोटी ५४ लाख २८ हजार २०० रुपये निधी अपेक्षित आहे, असे महसूल विभागाच्या सूत्रांनी सांगितले.