कृषी यांत्रिकीकरणासाठी आंध्रात यंत्र सेवा योजना

या योजनेच्या माध्यमातून राज्यातील शेतकऱ्यांना ट्रॅक्टर आणि बहुपयोगी हार्वेस्टरचे वाटप सुरु केले आहे. ट्रॅक्टर आणि हार्वेस्टर खरेदीसाठी राज्य सरकारकडून अनुदान देण्यात येत आहे.

मंगळवारी (तारीख ७ जून) मुख्यमंत्री वाय. एस. जगन मोहन रेड्डी यांच्या प्रमुख उपस्थितीत या योजनेची अंमलबजावणी सुरु करण्यात आली. आर. रामचंद्र रेड्डी, अंबाती रामबाबू, विदादाला रजनी, की. नागेश्वर राव आदी मंत्री यावेळी उपस्थित होते.

मुख्यमंत्री रेड्डी यांनी ५२६० शेतकऱ्यांच्या बँक खात्यांत अनुदानापोटी १७५ कोटी रुपयांची रक्कम जमा करून या योजनेचा शुभारंभ केला. त्यानुसार ८ जिल्ह्यांतील शेतकऱ्यांना १२०० ट्रॅक्टर आणि २० हार्वेस्टर वितरीत करण्यात आले.

वायएसआर यंत्र सेवा योजनेच्या माध्यमातून शेतकरी उत्पादक कंपन्यांना कृषी उपकरण खरेदीसाठी ४० टक्के अनुदान देण्यात येते. उर्वरित रक्कम उभी करण्यासाठी बँका त्यांना अल्प व्याजदरात कर्ज देणार आहेत. या कंपन्यांना १० टक्के रक्कम भरली की कृषी उपकरणे खरेदी करता येणार आहेत.

वायएसआर यंत्र सेवा योजने अंतर्गत शेतकऱ्यांना सर्व प्रकारच्या कृषी उपकरणांसाठी अनुदान देण्यात येणार आहे. यापूर्वी शेतकऱ्यांवर अनुदानित कृषी उपकरणे खरेदीसाठी जी बंधने होती, ती काढून टाकण्यात आली आहेत. शेतकरी स्वतःच्या मर्जीनुसार उपकरणे निवडतील आणि सरकार केवळ अनुदान देण्याचे काम करेल

आतापर्यंत रयतू भरोसा केंद्राना ३८०० ट्रॅक्टर्स पुरवण्यात आले आहेत. येत्या काळात सर्वच रायतू भरोसा केंद्रांकडे ट्रॅक्टर्स, हार्वेस्टर्स असतील. राज्यातील सर्व रयतू भरोसा केंद्रांत एकूण १०७५० वायएसआर यंत्र सेवा केंद्र उभारण्यात येणार आहेत. त्यासाठी २०१६ कोटी रुपयांचा खर्च केला जाणार आहे.

याखेरीज भातपिकाची लागवड करणाऱ्या परिसरात क्लस्टरनिहाय १६१५ यंत्र सेवा केंद्र उभारण्यात येणार आहेत. या केंद्रांच्या माध्यमातून शेतकऱ्यांना हव्या त्या हार्वेस्टरचा पुरवठा केला जाणार असल्याचेही रेड्डी यांनी नमूद केलं आहे.

शेती आणि शेतकऱ्यांसाठी आवश्यक त्या गोष्टींची एकाच ठिकाणी पूर्तता करण्याच्या हेतूने आंध्र प्रदेशचे मुख्यमंत्री वाय.एस. जगन मोहन रेड्डी यांनी राज्यात ही संकल्पना राबवली. आजमितीस आंध्र प्रदेशात १०,७७८ रयतु भरोसा केंद्रे शेती आणि शेतकऱ्यांच्या सगळ्या गरजांची पूर्तता करत आहेत.