हरभरा बाजाराला नाफेडच्या खरेदीचा आधार

देशात यंदा ८१ लाख ४३ हजार हेक्टरवर हरभरा पेरणी झाली होती. पाऊस चांगाल झाल्याने गेल्यावर्षीच्या तुलनेत दीड टक्क्याने पेरा वाढला होता.

वाढलेली पेरणी आणि पोषक वातावरणामुळे देशात यंदा १३१ लाख टन हरभरा उत्पादनाचा अंदाज सरकारने व्यक्त केला.

मात्र व्यापारी आणि प्रक्रिया उद्योगाच्या मते सरकारचा अंदाज खरा ठरणार नाही. यंदा देशात ८५ ते ९० लाख टनच हरभरा उत्पादन होईल.

सध्या बाजारात हरभरा आवक वाढली आहे. गुजरात, महाराष्ट्र, कर्नाटक, आंध्र प्रदेश या राज्यांतील बाजरात हरभरा आवक वाढली.

आवकेच्या दबावामुळे हरभरा दर सध्या दबावात आहेत. सरकारने यंदा हरभऱ्याला ५२३० रुपये प्रतिक्विंटल हमीभाव जाहिर केला. मात्र बाजारात सध्या ४ हजार ५०० ते ५ हजार रुपयांपर्यंत दर मिळत आहेत.

खुल्या बाजारात दर कमी असल्याने शेतकरी नाफेडला विक्री करत आहेत. नाफेडने आतापर्यंत देशभरात ७ लाख २३ हजार टन हरभऱ्याची खरेदी केली.

सध्या खुल्या बाजारात दर कमी असल्याने जास्तीत जास्त शेतकऱ्यांनी नाफेडला हरभरा विक्री करावी, असे आवाहन जाणकारांनी केले.