नगर  : दूध दराचा प्रश्न सोडवण्यासाठी राज्य सरकार सक्षम आहे. त्याबाबत बैठकाही झाल्या आहेत. राज्य सरकार याबाबत लवकरच धोरण ठरवणार आहे. मात्र, विषय मार्गी लागतोय असे दिसले की भाजप आंदोलन पुकारते, अशी टीका आमदार रोहित पवार यांनी केली. केंद्र सरकार दूध पावडर आयात करीत आहे. त्यावरही भाजप नेत्यांनी आंदोलन करताना बोलावे, असेही ते म्हणाले.   

नगर येथील जिल्हा रुग्णालयाला आमदार पवार यांनी भेट देत ‘कोरोना’चा आढावा घेतला. त्यावेळी पत्रकारांशी बोलताना श्री. पवार म्हणाले, एखादा विषय मार्गी लागण्याच्या स्तरावर असेल, तेव्हा भाजप आंदोलन करीत असते. ही भाजपची सवय आहे. भाजपचे जे नेते महाराष्ट्रात आंदोलन करतात ते केंद्र सरकार दूध पावडर आणत आहे म्हणून कधी आंदोलन करणार, असा सवाल त्यांनी केला. राज्य सरकारबाबत भाजपने काळजी करू नये. राज्य सरकार लोकहिताचे असून ते खूप चांगल्या पद्धतीने काम करीत आहे, असे श्री. पवार म्हणाले.