निरगुडसर, जि. पुणे ः यंदा हवामानातील बदल व परतीच्या पावसामुळे द्राक्ष उत्पादनात प्रतिएकर सरासरी तीन ते चार टनांनी घट झाली आहे. उत्पादन खर्च वाढला आहे. परंतु, यंदा दर्जेदार निर्यातक्षम जंबो द्राक्षांना प्रतिकिलो १३० रुपये दर मिळत आहे. गेल्या चार ते पाच वर्षांच्या तुलनेत सध्या दर चांगला असल्याने शेतकऱ्यांमध्ये समाधानाचे वातावरण आहे.

नाशिक, सांगलीसह पुणे जिल्ह्यातील जुन्नर, इंदापूर, बारामती तसेच आंबेगाव तालुक्यातील द्राक्षबागांना परतीच्या पावसाचा फटका बसून मोठे नुकसान झाले. बागा उद्ध्वस्त झाल्यामुळे द्राक्ष उत्पादन मोठ्या प्रमाणात घटले आहे. ज्या ठिकाणी पावसाच्या तडाख्यातून द्राक्ष बागा वाचल्या त्या ठिकाणीही उत्पादनात कमालीची घट झाली आहे. प्रतिएकर १० ते १२ टन मिळणारे उत्पादन ७ ते ८ टनांवर आले आहे. एकरी ३ ते ४ टनांनी उत्पादनात घट झाली आहे. परंतु, चांगला दर मिळत असल्याने उत्पादनातील घटीची तूट भरून निघत आहे.

आंबेगाव तालुक्यात कळंब, चांडोली, लौकी, महाळुंगे-पडवळ, नागापूर परिसरात द्राक्षशेती आहे. हवामानातील बदल, अवेळी पाऊस, धुक्याचा फटक्यामुळे सध्या द्राक्षांचा आकार कमी असून, क्रॅकिंगचे प्रमाण अधिक आहे. नागापूर (ता. आंबेगाव) येथील द्राक्ष बागायदार व बाजार समितीचे सभापती देवदत्त निकम यांच्या १३ एकर क्षेत्रावरील जंबो व रेड ग्लोब द्राक्षांची तोडणी सध्या सुरू आहे. त्यांना प्रतिएकरी ९ ते १० टन उत्पादन मिळते. प्रतवारीनुसार जंबो द्राक्षांना प्रतिकिलो ८० ते १३० रुपये दर मिळत आहे. हाच दर मागील काही वर्षांत ७० ते ८० रुपये प्रतिकिलो होता, असे द्राक्ष बागायदार घनश्याम निकम यांनी सांगितले. 

देवदत्त निकम म्हणाले की, हवामानातील बदल, अवेळी पावसामुळे यंदा एकरी द्राक्ष उत्पादनात मोठी घट झाली आहे. उत्पादन खर्चात वाढ झाली आहे. परंतु, मागील वर्षीच्या तुलनेत यंदा दर चांगला मिळत आहे.