पुणे : बंगालच्या उपसागरातील कमी दाबाच्या क्षेत्रामुळे पोषक हवामान झाल्याने विदर्भ, मराठवाड्यात तुरळक ठिकाणी मुसळधार पाऊस पडला. आजपासून (ता. १९) राज्यात पाऊस उघडिप देणार असून, मुख्यत: कोरड्या हवामानाचा अंदाज हवामान विभागाने वर्तविला आहे.  

बंगालच्या उपसागरातील कमी दाबाचे क्षेत्र मध्य प्रदेश आणि परिसराकडे सरकले आहे. यातच बंगालच्या उपसागरातील चक्राकार वाऱ्यांच्या प्रभावामुळे पश्चिम बंगाल आणि ओडिशा परिसरावर नवीन कमी दाब क्षेत्राची निर्मिती झाली आहे. पश्चिमी चक्रावात आणि पूर्वेकडून वाहणाऱ्या वारे एकत्र आल्याने उत्तर भारतात पाऊस पडण्याची शक्यता आहे. तर बंगालच्या उपसागरावरून वाहणारे वारे आणि कमी दाब क्षेत्रामुळे पूर्व आणि ईशान्य भारतात मुसळधार पावसाचा इशारा देण्यात आला आहे.पोषक हवामानामुळे विदर्भ आणि मराठवाड्यात हलक्या ते मध्यम पावसाने हजेरी लावली आहे. तुरळक ठिकाणी झालेल्या मुसळधार पावसाने कपाशीसह खरिपाच्या काढणीस आलेल्या पिकांचे नुकसान झाले आहे. हा पाऊस उघडिप देणार असून, आजपासून राज्यात हवामान मुख्यतः कोरडे राहण्याची शक्यता वर्तविण्यात आली आहे. 

सोमवारी (ता. १८) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) : पुणे ३१.६ (१९.१), नगर - (२०.१), जळगाव २६.० (२३.२), कोल्हापूर ३२.६ (२१.६), महाबळेश्वर २५.२ (१६.२), मालेगाव ३२.० (२२.०), नाशिक ३१.७ (२०.६), सांगली ३३.६ (२१.२), सातारा ३१.९ (१९.४), सोलापूर ३३.८ (२०.०), सांताक्रूझ ३३.८ (२५.८), अलिबाग - (२३.७), डहाणू ३२.७ (२५.५), रत्नागिरी ३२.८ (२३.६), औरंगाबाद २७.९ (२१.२), बीड ३०.८ (१९.०), नांदेड - (२२.२), उस्मानाबाद - (२१.०), परभणी २८.० (२२.६), अकोला ३०.२ (२३.५), अमरावती २६.० (२१.१), ब्रह्मपुरी ३३.५ (२१.२), बुलडाणा २५.६ (२१.३), चंद्रपूर २९.८ (२४.२), गडचिरोली ३०.० (२४.२), गोंदिया ३१.० (२३.२), नागपूर ३०.८ (२३.५), वर्धा २९.० (२३.९), वाशीम - (२०.०), यवतमाळ २७.५ (२२.५).