नागपूर ः बुलडाणा, अमरावती नंतर नागपुरातील पहिल्या ‘कोरोना’ बाधिताच्या मृत्यूची नोंद झाली. त्यामुळे विदर्भातील बाधितांची संख्या ३२ तर मृतांची संख्या तीनवर पोचली आहे. 

विदर्भात सुरक्षाविषयक उपायांकडे लक्ष्य देण्यात आले आहे. प्रशासन स्तरावर देखील योग्य ती खबरदारी घेतली जात आहे. मात्र, काहींच्या बेजबाबदार वागण्याचा त्रास गाव शहरातील बहतांश नागरिकांना बसत असल्याचे चित्र आहे. नागपुरात बाधितांची संख्या वाढली असली तरी आजवर कोणाचा मृत्यू झाला नव्हता. 

नागपूरमध्ये ५२० जणांना क्‍वारंटाइन करण्यात आले आहे तर यापूर्वी ७४७ डिस्चार्ज झाले आहेत. नागपूर जिल्ह्यात एकही बाधीत दगावल्याची नोंद नव्हती असे असताना सतरंजीपूरा भागातील एका व्यक्‍तीचा मृत्यू झाला. त्याचे नमुने तपासणीअंती पॉझिटिव्ह  आले. 

वसाहतीतील एका डॉक्‍टरकडून त्याने तपासणी केली होती. त्यांच्या कुटुंबात पाच लोक आहेत. हे सर्व एका छोट्याशा खोलीत राहतात. नागपुरातील या पहिल्या ‘कोरोना’बाधिताच्या मृत्यूनंतर विदर्भात एकूण मृत्यू झालेल्यांची संख्या तीनवर पोचली आहे. त्यामध्ये नागपूर, बुलडाणा, अमरावती जिल्ह्यातील प्रत्येकी एकाचा समावेश आहे.