सांगली : ‘‘महापूराने सांगली, कोल्हापूर जिल्ह्याचे मोठे नुकसान झाले. सरकारकडून मदत मिळाली. मात्र, अद्यापही शेती, रस्त्यांचे प्रश्न प्रलंबित आहेत. महापूरग्रस्तांसाठी मुख्यमंत्र्यांनी विशेष पॅकेज देण्याचे आश्वासन दिले आहे. लवकरच दोन्ही जिल्ह्यातील लोकप्रतिनिधींची बैठक घेतली जाणार आहे’’, अशी माहिती कृषी व सहकार राज्यमंत्री डॉ. विश्वजीत कदम यांनी पत्रकार परिषदेत दिली. 

जिल्हाधिकारी कार्यालयात मंत्री डॉ. कदम यांची आढावा बैठक झाली. त्यानंतर त्यांची पत्रकार परिषद झाली. सांगली, कोल्हापूर जिल्ह्याचे महापुराने प्रचंड नुकसान झाले. त्या काळातील मदत तोकडी आहे. 

डॉ. कदम म्हणाले, ‘‘शेती, घरं आणि रस्त्यांचे मोठे नुकसान झाले. अद्यापही मदतीची गरज आहे. महापुराच्या कालावधीत ब्रम्हनाळ घटना घडली होती. अनेकांना प्राण गमवावा लागला. भविष्यात पूरस्थितीचा सामना करावा लागणार नाही, याबाबतची दक्षता घेतली जात आहे. जिल्हाधिकाऱ्यांनी उपाययोजनांबाबत अहवाल तयार केला असून तो शासनाला सादर केला आहे.’’ 

‘‘मॉन्सूनचे चक्र बदलले आहे. संभाव्य परिस्थिती लक्षात घेऊन तयारी करावी लागेल. तत्कालीन सरकारने पाच वर्षात अनावश्‍यक योजनांसाठी खर्च केला. महाविकास आघाडीपुढे अनेक अडचणी आहेत. मात्र तीन पक्षांचे असलेले महाविकास आघाडीचे सरकार लोकांसाठी प्रश्न सोडवण्यासाठी कार्यरत राहील.'' 

‘एफआरपी'साठी २८ जानेवारीला बैठक 

राज्यातील साखर कारखाने सुरु होवून दोन महिने झाले. उसाच्या एफआरपीचा प्रश्न प्रलंबित आहेत. याबाबत डॉ. कदम म्हणाले,"महापूर, दुष्काळामुळे ऊसाचे उत्पादन घटले. उताराही कमी झाला. कारखाने आर्थिक अडचणीत असल्याने एफआरपीचा प्रश्न प्रलंबित आहे. त्याबाबत मुख्यमंत्री उद्धव ठाकरे यांच्या उपस्थितीत २८ रोजी मुंबईत बैठक होत आहे.

डॉ. कदम म्हणाले...