सातारा ः दोन दिवसाच्या विश्रांतीनंतर सोमवारी (ता. १९) पावसाने पुन्हा दमदार हजेरी लावली. सातारा, वाई, कऱ्हाड, कोरेगाव तालुक्यातील काही गावांना पावसाने झोडपून काढले. अचानक आलेल्या पावसामुळे शेतकऱ्यांची धांदल उडाली. जिल्ह्यात २४ तासांत ८.८४ मिलिमीटर पावसाची नोंद झाली. 

परतीच्या पावसामुळे अगोदर नुकसान झाले असतानाच सोमवारी पावसाने पुन्हा दणका दिला. दोन दिवस विश्रांती दिल्यामुळे खरीप पिकांची काढणी सुरू करण्यात आली. मात्र, दुपारी एक वाजण्याच्या सुमारास पावसाने अचानक हजेरी लावली. सातारा, वाई, कऱ्हाड, कोरेगाव तालुक्यातील काही गावात मुसळधार पाऊस झाला. कमी कालावधीत जोरदार पाऊस झाला. त्यामुळे शेतात पाणीच पाणी झाले.

शेतात केलेली बांधबंदिस्ती वाहून गेली आहे. या पावसाचा भात, ज्वारी, भुईमूग, आले, स्ट्रॅाबेरी तसेच रब्बी हंगामातील पेरणी झालेल्या पिकांच्या रानात पाणी साचले. त्यामुळे उगवणीवरही परिणाम होणार आहे. दुष्काळी माण, फलटण, खटाव, खंडाळा तसेच महाबळेश्वर तालुक्यात हलका ते मध्यम स्वरूपाचा पाऊस झाला. मंगळवारी पावसाची उघडीप होती.

अधूनमधून ढगाळ वातावरण होते. कोयना धरण परिसरात पावसाची उघडीप राहिली. धरणातील पाण्याचा विसर्ग पूर्णपणे बंद करण्यात आला. मंगळवारी सकाळी आठपर्यंत धरणात एकूण १०४.१७ टीएमसी पाणीसाठा झाला.

तालुकानिहाय पाऊस (मि.मी)

सातारा-१९.२३, जावळी - ७.६७, पाटण-२.०९, कऱ्हाड - १२.३८, कोरेगाव - ९.९६, खटाव - ६.४८, माण - १.४३, फलटण - ६.३३, खंडाळा - २.५०, वाई-१६.२९, महाबळेश्वर - १.००.