जळगाव : खानदेशात रब्बी हंगामात नोव्हेंबरच्या मध्यात लागवड केलेल्या मका पिकाची मळणी सुरू झाली आहे. मळणीला अलीकडेच सुरुवात झाली आहे. एकरी उत्पादन २२ ते २८ क्विंटल एवढे येत आहे. 

मक्याची लागवड खानदेशात रब्बी हंगामात कमी झाली होती. अमेरिकन लष्करी अळीचा प्रकोप, वाढता उत्पादन खर्च व बाजारातील कमी दर, पाण्याची अधिक गरज, वन्यप्राण्यांकडून मक्याचे होणारे मोठे नुकसान आदी कारणांमुळे शेतकऱ्यांनी मक्याची लागवड टाळली. परंतु धुळ्यातील शिरपूर, जळगावमधील चोपडा, जळगाव, जामनेर भागांत लागवड अनेक शेतकऱ्यांनी केली. ठिबकवर अनेकांनी पिकाचे सिंचन केले. काळ्या कसदार जमिनीत पीक जोमात होते.

लष्करी अळी रोखण्यासाठी दोनदा फवारणी घेतली. तसेच दोनदा रासायनिक खतांची निर्देशित मात्राही शेतकऱ्यांनी दिली. यंदा फवारणी, खते, बियाणे यावरच खर्च वाढला. तसेच मका पिकाचे वन्यप्राण्यांकडून होणारे नुकसान रोखण्यासाठी रखवालदारांची नियुक्ती देखील अनेक शेतकऱ्यांनी केली. यात यंदा मका पिकाला एकरी १५ हजार रुपये किमान उत्पादन खर्च आला आहे. त्यात पूर्वमशागत, बियाणे, लागवडीची मजुरी, दोन फवारण्या, खते, कापणी व मळणीचा खर्च समाविष्ट आहे. 

मक्याचे तापी, गिरणा, अनेर नदीकाठच्या भागात एकरी २२ ते २८ क्विंटल उत्पादन येत आहे. मळणी मे महिन्याच्या पहिल्या आठवड्यापर्यंत सुरू राहील. १५ तारखेनंतर मळणीला आणखी वेग येईल. यंदा उत्पादन बऱ्यापैकी येत आहे. परंतु बाजारात दर हमीभावापेक्षा कमी आहेत. यामुळे शासकीय किंवा हमीभावात खरेदी लवकर सुरू करण्याची मागणी शेतकरी करीत आहेत. गेल्या वर्षी ही खरेदी जूनमध्ये सुरू झाली होती. यंदा ही खरेदी मे अखेरीस सुरू करावी, असा मुद्दा शेतकरी उपस्थित करीत आहेत.

मक्याची लागवड कमी असल्याने शासकीय खरेदीसंबंधी यंत्रणेवर फारसा ताणही पडणार नाही, असेही जाणकारांचे मत आहे. बाजारात हमीभावापेक्षा ६०० ते ६५० रुपये कमी दर शेतकऱ्यांना मिळत आहे. १८५० रुपये क्विंटल, असा मक्याला हमीभाव आहे.