कोल्हापूर : पूरबाधित उसाची प्राधान्याने तोड देण्याप्रश्‍नी जिल्हाधिकारी राहुल रेखावार यांनी गुरुवारी (ता.२१) पूरबाधित क्षेत्रातील लोकप्रतिनिधी, साखर कारखान्यांचे प्रतिनिधी व आंदोलक संघटना यांची व्यापक बैठक घेण्याची ग्वाही दिली. खासदार धैर्यशील माने यांच्यासह आंदोलन अंकुशच्या मागणीवरून जिल्हाधिकारी यांनी साखर सह संचालकांना या बाबतचे आदेश दिले.  पूरबाधित ऊस तोडण्यास अनेक कारखाने शेतकऱ्यांची गळचेपी करतात. पूरबाधित ऊस तोडताना मजूर व वाहतूकदाराकडून शेतकऱ्यांची अडवणूक केली जाते. प्रत्येक कारखान्याच्या कार्यक्षेत्रातील पूरबाधित क्षेत्राची माहिती व ते तोडण्याचे नियोजन ही सर्व माहिती साखर कारखान्यानी हजर करून त्याप्रमाणे या हंगामात अंमलबजावणी करण्याच्या सक्त सूचना जिल्हाधिकारी यांनी साखर कारखान्यांना कराव्यात, अशी मागणी खासदार धैर्यशील माने यांनी जिल्हाधिकाऱ्यांना भेटून केली. ती तत्काळ मान्य करून जिल्हाधिकारी यांनी गुरुवारी (ता.२१) सायंकाळी पूरबाधित क्षेत्रातील लोकप्रतिनिधी, साखर कारखान्यांचे प्रतिनिधी व आंदोलक संघटना यांची व्यापक बैठक घेण्याचे मान्य केले.  आंदोलन अंकुशचे धनाजी चुडमुंगे म्हणाले, ‘‘महापुराचा ऊस शेतीला फटका बसला आहे. बाधित ऊस तातडीने तोडण्याची गरज आहे. या आधीच्या पुरावेळी कारखानदारांनी बाधित ऊस प्राधान्याने तोडण्याची ग्वाही दिली. मात्र, कार्यवाही केली नाही. त्यामुळे या वर्षी असा प्रकार घडू नये. बाधित उसाची प्राधान्याने तोडणी करावी.’’ या वेळी दत्तात्रय जगदाळे, सुनील बाबर, वीरचंद पाटील उपस्थित होते.