नाशिक : औरंगाबाद जिल्ह्यातील लामकाना येथील प्रयोगशील शेतकरी कृष्णा बारबैले यांच्या उच्च गुणवत्तेच्या डाळिंबाला बुधवारी (ता. 4) नाशिक बाजार समितीच्या लिलावात 130 रुपये किलो याप्रमाणे दर मिळाला. एक नंबर डाळिंबाला प्रति क्रेटला 2600 तर 2 नंबर डाळिंबाला प्रति क्रेटला 1600 रुपये दर मिळाला. या हंगामातील हा उच्चांकी दर असल्याचे बाजार निरीक्षक मनोज झाडे यांनी सांगितले.

बारबैले यांनी बाजारात 1 नंबर गुणवत्तेचे 80 क्रेट व 2 नंबर गुणवत्तेचे 52 क्रेट इतका माल आणला होता. डाळिंब फळाचे सरासरी वजन हे 450 ग्रॅम होते. एकसारखा रंग, आकर्षकपणा व गोडी यामुळे हा चांगला दर मिळाला.

नाशिक बाजार समितीत दसऱ्यापासून डाळिंबाची आवक घटली आहे. या काळात डाळिंबाला परराज्यातून मागणी वाढली आहे. त्यामुळे दरात सुधारणा होत असल्याचे चित्र आहे. गत सप्ताहात डाळिंबाला प्रति 20 किलो वजनाच्या क्रेटला सरासरी 800 ते 1600 व सरासरी 1000 रुपये दर मिळाले. बुधवारी मात्र त्यात वाढ होऊन हे दर 2600 पर्यंत वधारले आहेत.