नांदेड  ः पंतप्रधान किसान सन्मान निधी (पीएम किसान) योजनेअंतर्गत लाभार्थी शेतकऱ्यांना कर्जपुरवठा करण्यासाठी केंद्र सरकारतर्फे मोहीम राबविली जात आहे. या योजनेच्या लाभार्थ्यांपैकी आत्तापर्यंत पीककर्ज न घेतलेल्या शेतकऱ्यांना १५ दिवसाच्या कालावधीत पीककर्ज देण्यात येणार आहे. या मोहिमेत जिल्ह्यातील पात्र शेतकऱ्यांना पीककर्ज देण्याचे नियोजन असून यासाठी शेतकऱ्यांनी पंतप्रधान किसान सन्मान निधीचे खाते असलेल्या बँकेशी संपर्क साधावा, असे आवाहन जिल्हाधिकारी अरुण डोंगरे यांनी केले. जिल्ह्यातील बँकांकडून त्यासाठी विशेष मोहीम हाती घेण्यात आली आहे. त्यासाठी शेतकऱ्यांनी पंतप्रधान किसान निधी योजनेचा लाभ मिळत असलेल्या बँकेशी संपर्क साधावा, असेही आवाहन जिल्हाधिकारी अरुण डोंगरे, जिल्हा उपनिबंधक (सहकारी संस्था) प्रवीण फडणीस यांनी केले आहे.