कोल्हापूर  : बियाण्यांच्या उगवणीप्रश्नी विक्रेत्यांना नाहक जबाबदार धरत असल्याच्या निषेधार्त जिल्ह्यातील सुमारे दिड हजार कृषी सेवा केंद्रे शुक्रवार (ता.१०) पासून बंद ठेवण्यात आली आहेत. रविवार (ता.१) अखेर ही केंद्रे बंद रहाणार आहेत. 

महाराष्ट्र फर्टिलायझर्स पेस्टिसाइड सीड्स डीलर असोसिएशनच्या वतीने हा बंद पुकारण्यात आला आहे. याला विक्रेत्यांनी चांगला प्रतिसाद दिला. जिल्ह्यातील खासगी कृषी सेवा केंद्रांसह सहकारी संघांच्या शाखांनीही यात सहभाग घेतला आहे.   युरिया सोबतचे लिंकिंग बंद करावे, सॅम्पल काढलेल्या मालाची रक्कम मिळावी व सॅम्पल फेल गेल्यास कंपनीवर गुन्हा दाखल करून विक्रेत्यास साक्षीदार करावे आदीसह अन्य मागण्या संघटनेतर्फे करण्यात आल्या. 

बियाणे विक्री ही पॅकबंद पॅकेटमधून केली जाते. यात विक्रेत्यांची काहीही चूक नसते. कंपन्यावर गुन्हे दाखल न करता या प्रकाराला विक्रेत्यांना जबाबदार धरुन त्यांच्यावर गुन्हे दाखल करण्यात येत आहेत. हे संतापजनक असून अशी कारवाई विक्रेत्यांना मारक ठरत असल्यानेच सरकारचे लक्ष वेधून घेण्यासाठी आम्ही बंद पुकारल्याचे संघटनेचे जिल्हाध्यक्ष अध्यक्ष विनोद पाटील, उपाध्यक्ष विकास कदम यांनी सांगितले.