नांदेड ः लोकसभा निवडणुकीच्या मतदानाच्या दिवशी गुरुवारी (ता. १८) जिल्ह्यात भरणारे सर्व आठवडे बाजार बंद ठेवण्याचे आदेश जिल्हाधिकारी तथा जिल्हादंडाधिकारी अरुण डोंगरे यांनी निर्गमीत केले आहेत.   

जिल्ह्यातील नांदेड, हिंगोली आणि लातूर या लोकसभा मतदारसंघांतील किनवट, हदगाव, भोकर, नांदेड उत्तर, नांदेड दक्षिण, लोहा, नायगाव, देगलूर मुखेड या नऊ विधानसभा मतदारसंघांत गुरुवारी (ता. १८) मतदान होणार आहे. त्याअनुषंगाने पणन संचालक महाराष्ट्र राज्य पुणे यांनी मतदानाच्या दिवशी जिल्ह्यात भरणारे सर्व आठवडे बाजार बंद ठेवण्यास परवानगी दिली आहे. 

मालेगाव (ता. अर्धापूर), नायगाव (बा.), भोकर, वाळकी खु, ल्याहारी (वाळकी फाटा), तळणी (ता. हदगाव), उमरी बा., बेल्लोरी (धा.) (ता. किनवट), लोणी (ता.देगलूर), बिलोली, बेटमोगरा, राजुरा बु (ता. मुखेड), सिडको (ता. नांदेड), कुरुळा, मंगलसांगवी (ता. कंधार) या ठिकाणी गुरुवारी भरणारे आठवडे बाजार दुसऱ्या दिवशी म्हणजे शुक्रवारी (ता. १९) भरविण्यात यावेत, असे आदेश जिल्हा प्रशासनातर्फे देण्यात आले आहेत.