परभणी ः टोमॅटोच्या दरात गेल्या महिनाभरापासून मोठी घसरण झाली आहे. त्यामुळे मजुरी, वाहतूक यावर झालेल्या खर्च निघेना झाला आहे. त्यामुळे टोमॅटो उत्पादक शेतकऱ्यांना मोठा फटका बसला आहे. दर कमी झाल्यामुळे मार्केटमध्ये विक्रीसाठी नेणे परवडत नसल्यामुळे अनेक शेतकऱ्यांवर टोमॅटोचे पीक सोडून द्यायची वेळ आली आहे.

यंदा जिल्ह्यात सिंचनासाठी पुरेशा प्रमाणात पाणी उपलब्ध असल्यामुळे विविध प्रकारच्या भाजीपाल्याची लागवड केली आहे. गेल्या दोन तीन महिन्यांत जिल्ह्यातील सर्वच ठिकाणच्या मार्केटमध्ये भाजीपाल्याची मोठी आवक वाढली आहे. परभणी येथील भाजीपाला मार्केट टोमॅटोच्या आवकेत वाढली आहे.

गेल्या दोन महिन्यांत प्रतिक्विंटलला सरासरी १५० ते २०० पर्यंत दर कमी झाले आहेत. ‘कोरोना’ विषाणूचा संसर्ग रोखण्यासाठी आठवडे बाजार बंद करण्यात आले आहेत. त्यामुळे शेतकऱ्यांना परभणी येथील मार्केटमध्ये टोमॅटोसह अन्य भाजीपाला विक्रीसाठी आणावा लागत आहे. लॅाकडाऊनमुळे वाहतुकीसाठी अडचणी येत आहे. 

वाहनचालकांनी भाड्यामध्ये वाढ केली आहे. त्यामुळे टोमॅटो उत्पादकांच्या अडचणीत वाढल्या आहे. मोरेगाव (ता. सेलू) येथील परमेश्वर कादे यांच्या सव्वा एकर क्षेत्रातील टोमॅटोपासून मार्च महिन्याअखेर पर्यंत ४०० ते ५०० क्रेट (८० ते १०० क्विंटल) टोमॅटोची विक्री झाली. गेल्या काही दिवसांत प्रतिक्रेट ३० ते ४० रुपये पर्यंत घसरण झाली आहे.