अकोला ः खरीप हंगामापूर्वी होणारी राज्यातील चार कृषी विद्यापीठांच्या संयुक्त कृषी संशोधन व विकास समितीची (जॉइंट ॲग्रेस्को) बैठक कोरोनामुळे यंदा लांबणीवर पडली होती. अखेरीस ही बैठक या महिन्याच्या शेवटच्या आठवड्यात ऑनलाइन पद्धतीने होऊ घातली असून त्या दृष्टीने तयारी सुरु झाली आहे. 

कृषी विद्यापीठांचे संशोधन, शिफारशी, नवीन वाण प्रसारित करण्याच्या अनुषंगाने ही बैठक महत्त्वाची राहते. मुख्यमंत्री, कृषी मंत्र्यांच्या उपस्थितीत दरवर्षी बैठक घेतली जाते. रोटेशननुसार ही बैठक यंदा अकोला येथे डॉ. पंजाबराव देशमुख कृषी विद्यापीठात होणार होती. परंतु कोरोनामुळे लॉकडाऊन सुरु झाल्याने बैठक घेण्यास अडचणी आल्या. साधारणपणे ही बैठक मे महिन्याच्या शेवटच्या आठवड्यात होत असते. सन १९९३ पासून ही परंपरा आहे. 

या बैठकीत राज्यातील चारही कृषी विद्यापीठे, संशोधन केंद्रांनी विकसित केलेले वाण, शिफारशी, संशोधनाची मांडणी केली जाते. बैठकीदरम्यान तज्ज्ञांकडून त्यावर सविस्तर विचारमंथन होऊन शिक्कामोर्तब होत असते. प्रामुख्याने खरीप, रब्बी, उन्हाळी हंगामात घेतल्या जाणाऱ्या विविध पिकांचे वाण, खत व्यवस्थापन, कीड नियंत्रण, यंत्र-तंत्र, शेतमाल उत्पादन वाढीसाठी शिफारशी, अशा विविध प्रकारच्या बाबी याद्वारे निश्‍चित होतात नंतर शेतकऱ्यांपर्यंत पोचतात. 

यंदाच्या बैठकीसाठी कृषीमंत्री दादा भुसे यांनी मध्यंतरी बैठक घेऊन चर्चासुद्धा झाली होती. परंतु कोरोनाचा काळ न संपल्याने अखेरीस ही बैठक आता ऑनलाइन पद्धतीने होऊ घातली आहे. २७ ते ३१ ऑक्टोबर या काळात बैठक घेण्याचे नियोजन केले जात आहे. बैठकीच्या अनुषंगाने करावयाच्या विविध तयारी सुरु झाल्या आहेत. काही समित्यांचे गठणही होत आहे. लवकरच बैठकीच्या आराखड्यावर अंतिम शिक्कामोर्तब होणार असून बैठकीची निश्‍चितता अंतिम केली जाईल, असे सूत्रांकडून सांगण्यात आले.