अकोला ः डॉ. पंजाबराव देशमुख कृषी विद्यापीठ व महाराष्ट्र कृषी शिक्षण व संशोधन परिषदेच्या संयुक्त विद्यमाने संयुक्त कृषी संशोधन आणि विकास समितीची (जाॅइंट अॅग्रेस्को ) मंगळवारपासून (ता.२७) बैठक आयोजित करण्यात आली आहे. मंगळवारी दुपारी १२ वाजता ऑनलाइन पद्धतीने मुख्यमंत्री उद्धव ठाकरे यांच्याहस्ते उद्घाटन होणार आहे. 

यावेळी अध्यक्षस्थानी कृषिमंत्री दादा भुसे राहतील. तर कार्यक्रमात केंद्रीय राज्यमंत्री संजय धोत्रे, रोजगार हमी व फलोत्पादन मंत्री संदीपान भुमरे, पालकमंत्री बच्चू कडू, कृषी राज्यमंत्री विश्वजीत कदम, आदिती तटकरे, कृषी सचिव एकनाथ डवले, कृषी शिक्षण व संशोधन परिषदेचे महासंचालक विश्वजीत माने, महात्मा फुले कृषी विद्यापीठाचे कुलगुरू डॉ. के. पी. विश्वनाथा (राहूरी), वसंतराव नाईक मराठवाडा कृषी विद्यापीठाचे कुलगुरू डॉ. एस. एस. ढवण (परभणी), डॉ. बाळासाहेब सावंत कोकण कृषी विद्यापिठाचे कुलगुरू डॉ. एस. डी. सावंत (दापोली) यांची प्रमुख उपस्थिती असेल. तर स्वागताध्यक्ष म्हणून डॉ. पंजाबराव देशमुख कृषी विद्यापीठाचे कुलगुरू डॉ. व्ही. एम.भाले सहभागी होतील. 

उद्घाटन सत्राचे स्वागत विद्यापिठाचे संशोधन संचालक डॉ. व्ही. के. खर्चे करतील. तर प्रास्ताविक कुलगुरू डॉ. भाले करतील. यानंतर राज्यमंत्री संजय धोत्रे, कृषिमंत्री दादा भुसे व शेवटी कार्यक्रमाचे उद्घाटक मुख्यमंत्री उद्धव ठाकरे मार्गदर्शन करतील. उद्घाटन सत्राचे आभार प्रदर्शन कृषी व संशोधन परिषदेचे संशोधन संचालक डॉ. हरीहर कौसडीकर करतील. 

दरवर्षी मे महिन्यात होणारी ही बैठक यंदा रोटोशननुसार अकोल्यात नियोजित होती. मात्र या काळात कोरोनाचा प्रादुर्भाव असल्याने ही बैठक पुढे ढकलण्यात आली होती. अखेरीस मुख्यमंत्री व कृषिमंत्र्यांकडून बैठकीबाबत हिरवी झेंडी मिळाल्यानंतर मंगळवारपासून ही बैठक सुरु होत आहे. यात विविध वाण, यंत्र, तंत्र, शिफारशी ठेवल्या जाणार आहेत.