नाशिक : लॉकडाऊननंतर समाजातील आर्थिकदृष्ट्या दुर्बल घटक, फेरीवाले, विक्रेते, घरकाम करणारे, सुरक्षारक्षक आदींवर उपासमारीची वेळ येऊ नये, यासाठी केंद्र शासनाकडून मोफत तांदूळ वाटप योजनेबरोबरच घरातील गृहिणींच्या बँक खात्यातही पंतप्रधान जनधन योजनेच्या माध्यमातून दरमहा पाचशे रुपये जमा करण्यात येणार आहेत. त्यासाठी एप्रिल, मे व जून या तीन महिन्यांचे वेळापत्रक जाहीर करण्यात आले आहे. २ मे पासून संबंधित खातेधारकांच्या बँक खात्यात ही रक्कम वर्ग करण्यात येत असल्याचे, जिल्हा उपनिबंधक गौतम बलसाने यांनी कळविले आहे. 

सध्या सुरू असलेल्या कोविड-१९ या साथरोगामुळे एकाच वेळी बँक व ग्राहक सेवा केंद्रांवर गर्दी होऊ नये यासाठी वित्त मंत्रालयाच्या वित्तीय सेवा विभागामार्फत वेळापत्रक आखण्यात आले आहे. यानुसार लाभार्थ्यांना पैसे मिळणार आहेत. ५ मे रोजी खाते क्रमांकांचा शेवट २ किंवा ३ ने होतो त्या खात्यांतील रक्कम काढता येईल. ६ ज्या खाते क्रमांकांचा शेवट ४ किंवा ५ ने होतो त्या खात्यांतील रक्कम काढता येईल. तर ८ मे रोजी ज्या खाते क्रमांकांचा शेवट ६ किंवा ७ ने होतो त्या खात्यांतील रक्कम काढता येणार आहे. व ११ मे रोजी ज्या खाते क्रमांकांचा शेवट ८ किंवा ९ ने होतो त्या खात्यांतील रक्कम काढता येणार आहे. वित्तीय विभागाने आखून दिलेल्या वेळापत्रकाची नागरिकांनी नोंद घ्यावी, असेही श्री. बलसाने यांनी कळविले आहे.