आर्णी, यवतमाळ : पहिल्याच वेचणीत कपाशीचे उत्पादन घटले. त्याचा फटका शेतकऱ्यांसह जिनिंग मालकांनाही बसला आहे. जिनिंग दोनऐवजी एकाच शिफ्टमध्ये चालवावे लागत असल्याचे सूत्रांनी सांगितले. 

आर्णी तालुक्‍यात जिनिंगची संख्या सर्वाधिक आहे. परंतु गेल्या वर्षी गुलाबी बोंड अळीमुळे कपाशीच्या उत्पादकतेवर परिणाम झाला. त्याचा या तालुक्‍यातील जिनिंग व्यवसायालाही फटका बसला. या वर्षी दुष्काळामुळे उत्पादकता घटली. त्यामुळे जिनिंग व्यवसाय पुन्हा अडचणीत आला आहे. 

या व्यवसायावर अवलंबून असलेल्या मजूर, हमाल व इतरांनाही याचे चटके  बसत आहेत. सोबतच जागतिक  बाजारपेठेत रुईगाठीला भाव नाही. त्यामुळे जिनिंगला दहा वर्षांच्या काळात पहिल्यांदाच नुकसान सोसावे लागत आहे, असे स्वस्तिक जिनिंगचे संचालक गोपाल कोठारी यांनी सांगितले. 

मानुदास जिनिंगचे संचालक रंजित राठोड म्हणाले, ‘‘कपाशीची आवक कमी असल्याने दोन शिफ्टमधील व्यवसाय आता एकाच शिफ्टपुरता मर्यादित झाला आहे.’’