औरंगाबाद  : शेततळ्याच्या अस्तरीकरणाचे बाकी राहिलेले अनुदान मिळावे, यासाठी शेतकऱ्यांच्या कृषी विभागाकडे चकरा सुरू आहेत. २०१७-१८ मधील आरकेव्हीवाय योजनेअंतर्गत बाकी असलेले हे अनुदान मिळावे, अशी मागणी शेतकऱ्यांमधून होत आहे. 

आरकेव्हीवाय योजनेअंतर्गत मंजूर शेततळे अस्तरीकरणासाठी मिळणाऱ्या अनुदानाची पूर्ण रक्‍कम मिळाली नाही, असे शेतकऱ्यांचे म्हणणे आहे. त्यासाठी कृषी विभागाच्या तालुका व जिल्हा कार्यालयाकडे वारंवार विचारपूस केल्यानंतरही बजेट नाही, मागणी केली आहे, या पलीकडे ठोस उत्तर मिळत नसल्याचे शेतकऱ्यांनी सांगितले. 

कृषी विभागाच्या माहितीनुसार, औरंगाबाद जिल्ह्यातील जवळपास अडीचशे शेतकऱ्यांच्या अनुदानाचा हा प्रश्‍न आहे. त्यामध्ये पैठणसह वैजापूर तालुक्‍यातील शेतकऱ्यांची संख्या जास्त आहे. २०१७-१८ मध्ये आरकेव्हीवाय योजनेअंतर्गत अनुदानासाठी लागणारी रक्‍कम मिळावी म्हणून कृषी विभागाकडून लेखीही वरिष्ठ पातळीवर कळविण्यात आले. परंतु होत असलेल्या विलंबामुळे अनुदान मिळेल की नाही याची चिंता शेतकऱ्यांना लागली आहे. पैठण तालुक्‍यातील देवगाव, आडूळ, पोरगाव, गेवराई आदी गावांतील जवळपास १८ शेतकरी अनुदान न मिळालेले आहेत.