अकोला : शासनाने हमीभावाने मूग, उडदाची खरेदी करण्याची घोषणा केली असून, यासाठी शेतकऱ्यांना नोंदणी करण्याचे अावाहन केले अाहे. मात्र अनेक ठिकाणी नोंदणीसाठी दिलेल्या सॉफ्टवेअरमध्ये डाटा एन्ट्री होत नसल्याच्या तक्रारी येत अाहेत. त्यामुळे दोन दिवसांत नाव नोंदणी झालेल्या शेतकऱ्यांची संख्या नगण्य असल्याचे सांगण्यात येत आहे.

मूग, उडदाला सध्या खुल्या बाजारात हमीभावापेक्षा कमी दर मिळत अाहे. या दरामुळे शेतकरी चिंतातूर झाले अाहेत. या शेतमालाला किमान हमीभाव मिळावा, यासाठी शासनाने ‘नाफेड’च्या माध्यमातून खरेदी करण्याचे जाहीर केले. यासाठी केंद्राकडे विशेष परवानगीही मागण्यात अाली अाहे. ती प्राप्त होताच मुगाची बोनससह ५५७५ अाणि उडदाची ५४०० रुपये हमीभावाने खरेदी सुरू केली जाणार अाहे. पहिल्या टप्प्यात राज्यात ८३ ठिकाणी हे केंद्र कार्यान्वित होणार अाहे.

तूर खरेदीच्यावेळी ‘नाफेड’च्या खरेदी केंद्रांवर प्रचंड प्रमाणात गोंधळ झाला होता. त्यामुळे अाता मूग, उडीद खरेदीच्या वेळी हीच वेळ येऊ नये यासाठी शेतकऱ्यांची नोंदणी केली जात अाहे. शेतकऱ्याला किती माल विकायचा अाहे, त्याने किती लागवड केली होती याची माहिती दर्शविणारा सातबारा, पेरेपत्रक, अाधार क्रमांक, बँक खाते क्रमांक अशी सविस्तर माहिती सादर करावी लागणार अाहे. यासाठी एका साॅफ्टवेअरमध्ये माहिती नोंदविली जाणार अाहे. 

यासाठी एका कंपनीला सॉफ्टवेअरचे काम देण्यात अाले अाहे. मंगळवारी (ता.३) या नोंदणीचा शुभारंभ झाला; परंतु पहिल्याच दिवशी अनेक ठिकाणी हे साॅफ्टवेअर पोचले नव्हते. त्यानंतर अाता बुधवारी (ता.चार) दुसऱ्या दिवशीसुद्धा प्रचंड अडचणी अाल्याचे समजते.