सोलापूर : गेल्या वर्षीचा दुष्काळ अन्‌ चाराटंचाईमुळे उसाचा वापर झाला. त्यामुळे जिल्ह्यात आजघडीला ४७ हजार हेक्‍टर ऊस शिल्लक राहिला आहे. मागच्या वर्षी जिल्ह्यात ६८ हजार हेक्‍टर उसाचे क्षेत्र असताना २८ कारखान्यांनी गाळप हंगाम घेतला. पण तो अवघ्या काही दिवसातच संपला. यंदाही जिल्ह्यातील २४ साखर कारखान्यांनी गाळप परवान्यासाठी ऑनलाइन अर्ज केले आहेत. परंतु यंदाही उसाचे क्षेत्र ४७ हजार हेक्‍टरपर्यंत आहे. त्यामुळे तो किती कारखान्यांना पुरणार आणि किती कारखाने पूर्ण क्षमतेने चालणार याबाबत साशंकताच आहे. 

सांगली, कोल्हापूरसह अन्य जिल्ह्यांतील पूरस्थितीमुळे यंदाचा गाळप हंगाम १ नोव्हेंबरपासून सुरू करण्याचे नियोजन करण्यात आल्याचे साखर आयुक्‍तालयातील सूत्रांनी सांगितले. सर्वाधिक साखर कारखाने असलेल्या सोलापूर जिल्ह्यात दुष्काळात सुमारे २०० चारा छावण्या सुरू झाल्या. आजही जवळपास दीडशेहून अधिक छावण्या सुरूच आहेत. या सर्व छावण्यांची मदार उसावर आहे. त्यामुळे उसाच्या सर्वाधिक वापरामुळे प्रत्यक्ष गाळपाला किती मिळणार, याविषयी शंका आहे. 

आता फक्त ४७ हजार हेक्‍टर ऊस उपलब्ध असल्याचे आकडेवारी सांगते. शिवाय अनेक तालुक्यांत पाण्याअभावी शेतकऱ्यांनी उसाची नांगरट केली. पाण्याअभावी उसाची अपेक्षित वाढही झाली नाही. त्यामुळे एकरी उत्पादकता, गुणवत्ता या सगळ्या गोष्टींबाबत शंका उपस्थित होत आहे. या सर्व पार्श्‍वभूमीवर यंदा जिल्ह्यातील हंगामाकडेही लक्ष लागले आहे. 

या कारखान्यांनी मागितले परवाने

लोकमंगल शुगर, लोकमंगल ॲग्रो, चंद्रभागा, लोकनेते, विठ्ठलराव शिंदे, पांडुरंग, सहकार महर्षी, भैरवनाथ शुगर (३), श्री सिद्धेश्‍वर, जकराया, युटोपियन, विठ्ठल रिफायनरी, फॅबटेक, दि सासवड माळी, गोकूळ शुगर, जयहिंद, संत दामाजी, गोकूळ माउली, मातोश्री, कुर्मदास आणि विठ्ठल अशा २४ कारखान्यांनी गाळपाच्या परवानगीसाठी साखर आयुक्‍तांकडे ऑनलाइन अर्ज केले आहेत.