सांगली ः जिल्ह्यात ढगाळ वातावरण आणि पावसाच्या हलक्‍या सरींमुळे द्राक्ष उत्पादक शेतकऱ्यांची चिंता वाढली आहे. जिल्ह्यात एक लाख २० हजार एकरांवर द्राक्षबाग आहे. त्यातील ३० टक्के बागा अवकाळी पावसामुळे खराब झाल्या आहेत. यंदाच्या हंदामात ३५-४० टक्के द्राक्ष बागांची विक्री झालेली आहे; तर उर्वरित ३५ टक्के बागांवरील द्राक्षाची विक्री शिल्लक आहे. जिल्ह्यातील हंगाम मार्चअखेर लांबण्याची शक्‍यता आहे. खराब हवामानामुळे फळछाटण्या विलंबाने घेतल्या आहेत.  ढगाळ हवामानामुळे द्राक्षांत भुरी व मण्याला तडा जाण्याची स्थिती निर्माण झाली आहे. यंदा विविध प्रकारच्या चांगल्या दर्जाच्या द्राक्षाच्या पेटीला सरासरी दर १७० ते १८० रुपये मिळतो आहे. शेतकऱ्याची कोंडी करून गुंतवलेल्या रकमेएवढाही पैसा त्यांच्या पदरात पडू दिला जात नाही. चांगल्या दर्जाच्या मालही कमी दराने खरेदी केला जातो आहे. खराब मालाला यापेक्षा कमी दर मिळत असल्याचे सध्याचे चित्र आहे. पुढील पाच-सहा दिवस ढगाळ हवामान आणि वातावरणात बदल राहण्याचा अंदाज आहे. बदलत्या वातावरणामुळे हंगामाच्या सुरवातीपासून द्राक्ष शेती अडचणीत आहे. थंडीत दर कमी होते. सध्याच्या ढगाळ हवामानात पुन्हा दलालांकडून दर पाडले जात आहेत. उत्पादन खर्चाचा ताळमेळही जमत नसल्याचे सध्याचे चित्र आहे. - सुभाष आर्वे, अध्यक्ष, राज्य द्राक्ष बागायतदार संघ