धुळे : धुळे जिल्ह्यात ३० सप्टेंबरपर्यंत पशुधनावरील लाळ्या खुरकूत रोग प्रतिबंधक लसीकरण मोहीम राबविण्यात येत आहे. पशुपालकांनी या मोहिमेचा लाभ घ्यावा, असे आवाहन पशुसंवर्धन विभागाने केले आहे.  

लाळ्या खुरकूत रोग हा पशुधनातील विषाणूजन्य रोग आहे. या रोगास लाळ्या, तोंडखुरी, पायखुरी असेही म्हणतात. हा रोग पायात व्दिखुरी असलेल्या जनावरांध्ये आढळतो. या रोगाचा प्रसार हवेतूनही बाधित जनावरांमुळे होतो. जनावरांची पाणी प्यावयाची जागा, गव्हाणी व गुरांचे बाजार, आठवडे बाजार, जत्रा, पशुप्रदर्शन येथेही या रोगांचा फैलाव होऊ शकतो, असे पशुसंवर्धन विभागाने म्हटले आहे. 

लाळखुरकत या रोगामुळे जनावरांमधील मृत्युदर कमी आहे. पण, रोगाचा प्रादुर्भाव तीव्र स्वरुपाचा असल्याने गायी, म्हशींचे दूध कमी होण्याचे प्रकार वाढत आहेत. शेतीकाम, ओढकामासाठी वापरण्यात येणाऱ्या बैलांमध्ये अशक्तपणा येण्याची समस्या आहे.

यासंदर्भात ही मोहिम सुरू आहे. केंद्र सरकार पुरस्कृत राष्ट्रीय पशुरोग नियंत्रण कार्यक्रमांतर्गत तसेच राज्य शासनाच्या पशुसंवर्धन विभागामार्फत जिल्ह्यातील ४ ते ६ महिने वयावरील गोवर्गीय व म्हैसवर्गीय पशुधनाचे १०० टक्के लसीकरण करण्यात येणार आहे. 

या कार्यक्रमांतर्गत पशुधनास सहा महिन्यांच्या अंतराने वर्षातून दोन वेळा लसीकरण करावयाचे आहे.