नांदेड : जिल्ह्यात सन २०२०-२१ च्या खरिप हंगामासाठी विविध ग्रेडचा २ लाख २७ हजार ९८० टन खतसाठा मंजुर करण्यात आला. गतवर्षीचा शिल्लक आणि चालू महिन्यात प्राप्त असा मिळून सध्या एकूण ४४ हजार ६७० टन खतसाठा उपलब्ध आहे, अशी माहिती कृषी विभागाच्या सूत्रांनी दिली. 

यंदाच्या खरिप हंगामासाठी जिल्ह्यात युरिया ८७ हजार टन, सुपर फॉस्फेट २८ हजार ८०० टन, पोटॅश २४ हजार टन, डिएपी ६१ हजार टन, एपीके ५७ हजार ८०० टन अशी एकूण २ लाख ५८ हजार ६०० टन खतांची मागणी करण्यात आली. परंतु, २ लाख २७ हजार ९८० टन खतसाठा मंजुर करण्यात आला. त्यात युरिया ७८ हजार २१० टन, पोटॅश २० हजार ५०० टन, सुपर फॉस्फेट ३९ हजार ३५० टन, संयुक्त खते (एनपीके) ५२ हजार ५६० टन, डिएपी ३७ हजार ३६० टन या खतांचा समावेश आहे. 

सन २०१९-२० मधील विविध ग्रेडचा मिळून ३९ हजार ५०० टन खतसाठा शिल्लक आहे. एप्रिल महिन्यात ४ हजार २१० टन युरिया,९६० टन पोटॅश मिळून एकूण ५ हजार १७० टन खतसाठा उपलब्ध झाला. त्यामुळे सध्या एकूण ४४ हजार ६७० टन खते उपलब्ध आहेत. मंजुर खतसाठा दर महिन्याला टप्प्याटप्याने उपलब्ध होईल, असे कृषी विभागाच्या सूत्रांनी सांगितले.