सोलापूर ः अक्कलकोट तालुक्यातील कुरनूर मध्यम बोरी प्रकल्पातून २१०० क्युसेकचा विसर्ग सोडण्यात येत आहे. या पाण्याच्या विसर्गामुळे परिसरातील शेतकरी, ग्रामस्थांनी काही अडचण असल्यास तहसील प्रशासनाशी संपर्क साधावा, असे आवाहन करण्यात आले आहे. 

कुरनूर प्रकल्पाच्या पाणलोट क्षेत्रामध्ये अतिवृष्टी होऊन अक्कलकोट तालुक्यातील हरणा व बोरी या नद्यांच्या प्रवाहामध्ये जलदगतीने वाढ होत आहे. त्यामुळे कुरनूर धरण शंभर टक्के भरले आहे. पण अतिरिक्त पाण्यामुळे आता हे पाणी पुढे सोडण्यात आले आहे.

सध्या पाऊस थांबल्याने काहीशी परिस्थिती नियंत्रणात आहे. पण संभाव्य पूरपरिस्थितीच्या अनुषंगाने सतर्क राहावे, अशा सूचना नागरिकांना तहसीलदार बाळासाहेब शिरसट यांनी दिल्या.