नवी दिल्ली : कोरोना विषाणूने देशात थैमान घालायला सुरुवात केल्यानंतर केंद्राने २१ दिवसांचा लॉकडाऊन जाहीर केला आहे. या काळात देशातील शेतकरी, मजूर, गरीब नागरिक आणि निराधार महिलांना दिलासा देण्यासाठी १.७ लाख कोटींचे पॅकेज जाहीर केले आहे, अशी माहिती केंद्रीय अर्थमंत्री निर्मला सितारामन यांनी गुरुवारी (ता.२६) दिली. 

अर्थमंत्री निर्मला सितारामन यांनी पत्रकार परिषद घेत देशातील नागरिकांना दिलासा देण्यासाठीचे निर्णय जाहीर केले. ‘‘कोरोनाशी दोन करणाऱ्या सॅनिटेशन कामगार, डॉक्टर, नर्स, ‘आशा’ सेविका आणि पॅरामेडीक्स यांना प्रत्येकी ५० लाखांचे विमा संरक्षण देण्यात येणार आहे. देशातील जवळपास ८० कोटी किंवा एक तृतीयांश जनतेला पुढील तीन महिन्यांसाठी प्रत्येक माणसासाठी पाच किलो गहू आणि तांदूळ मोफत देण्यात येणार आहे. तसेच एक किलो दाळही मोफत देण्यात येणार आहे. त्यामुळे गरिबांचे हाल होणार नाहीत. त्यांना आवश्यक ते धान्य मिळेल. यापूर्वी पाच किलो धान्य देण्यात येत होते. आता आणखी पाच-पाच किलो गहू व तांदूळ देण्यात येणार आहे,’’ असे अर्थमंत्र्यांनी सांगितले. 

‘‘शेतकऱ्यांना एप्रिलच्या पहिल्या आठवड्यातच पंतप्रधान शेतकरी सन्मान निधीचा दोन हजार रुपयांचा हप्ता मिळणार आहे. ‘पीएम-किसान’ योजनेचा ८ कोटी ६९ लाख शेतकऱ्यांना लाभ मिळणार आहे. मनरेगा योजनेत कामगारांच्या वेतनात १८२ रुपयांवरून २०२ रुपयांपर्यंत वाढ करण्यात आली आहे. प्रतिकामगार दोन हजार रुपयांपर्यंत वाढ करण्यात आली आहे. या योजनेचा पाच कोटी कामगारांना लाभ होणार आहे,’’ अशी घोषणाही त्यांनी केली. 

महत्त्वाचे निर्णय... 

‘पीएम-किसान’चा हप्ता देणार  ‘‘लॉकडाऊनच्या काळात शेतकऱ्यांचे मोठे नुकसान झाले आहे. त्यामुळे शेतकऱ्यांना दिलासा देण्यासाठी पंतप्रधान शेतकरी सन्मान निधी योजनेचा हप्ता आर्थिक वर्षाच्या सुरुवातीलाच एप्रिल महिन्याच्या पहिल्या आठवड्यात देण्यात येणार आहे. देशातील ८ कोटी ६९ लाख शेतकऱ्यांना दोन हजार रुपयांचा हप्ता देण्यात येणार आहे. हा निधी शेतकऱ्यांच्या थेट खात्यात जमा होणार आहे,’’ अशी माहिती अर्थमंत्री सितारामन यांनी दिली.