अकोला ः सध्याच्या परिस्थितीत जिल्ह्यातील नागरिकांना ताजा भाजीपाला मिळावा यासाठी जिल्ह्यातील शेतकरी गट, कंपन्या सक्रिय झाल्या आहेत. गेल्या आठ दिवसांत जिल्ह्यात गटांनी सुमारे १७० टनांपेक्षा अधिक भाजीपाला व फळांची विक्री केली आहे. दररोज या परिस्‍थितीत सुधारणा होत आहे. भाजीपाला व फळ विक्री करताना योग्य ती काळजीही घेतली जात आहे. जिल्ह्यात ५४ गटांमार्फत ११० ठिकाणी विक्री केंद्र उघडण्यात आली आहेत.

शेतमाल व जीवनावश्‍यक वस्तूंची वाहतूक करण्यासाठी साडेसहाशे पेक्षा अधिक वाहनांना परवानगी देण्यात आली आहे. यामुळे भाजीपाला व फळांची वाहतूक काहीशी सुकर झाली आहे. गट व शेतकरी कंपन्यांनी १७० टनांपेक्षा अधिक विक्री केली आहे.

‘कोरोना’चा प्रादुर्भाव रोखण्यासाठी शासनाने १४ एप्रिलपर्यंत लॉकडाऊन जाहीर केला आहे. सोबतच संचारबंदीही लागू करण्यात आली आहे. यामुळे जीवनावश्‍यक वस्तूंच्या वाटपावर, उपलब्धतेवर मोठा परिणाम सुरुवातीच्या टप्प्यात झाला होता. भाजीपाला, फळे मिळणे अवघड झाले होते. परंतु कृषी विभागाने पुढाकार घेत भाजीपाला व फळे विक्रीसाठी गट व शेतकरी कंपन्यांच्या सहकार्याने विक्रीची साखळी निर्माण केली. 

जिल्ह्यात आता ५२  गट, शेतकरी कंपन्यांनी विपणन व्यवस्थेत सहभाग घेतला. प्रत्येक तालुक्यात थेट विक्री सुरू करण्यात आली. ११० ठिकाणे यासाठी निश्‍चित करण्यात आली आहेत. प्रामुख्याने अकोला उपविभागात अकोला, बार्शीटाकळी, मूर्तिजापूर या तीन तालुक्यांत तर अकोट उपविभागातील अकोट, तेल्हारा, बाळापूर, पातूर या चार तालुक्यात शेतमालाची विक्री केली जात आहे.