सिंधुदुर्ग  ः सिंधुदुर्ग जिल्ह्यात ‘कोरोना’चा पहिला रूग्ण आढळून आला आहे. हा रुग्ण कणकवली तालुक्यातील असून मंगलोर एक्सप्रेसने प्रवास करणाऱ्या कोरोना बाधित रूग्णांशी संपर्क आल्याने त्यास लागण झाल्याचे स्पष्ट झाले आहे. या रुग्णाला जिल्हा रुग्णालयात विलगीकरण कक्षात ठेवण्यात आले असल्याची माहिती जिल्हाधिकारी के. मंजुलक्ष्मी यांनी दिली.  

१९ मार्चला सीएसटीवरून सुटलेल्या मेंगलोर एक्सप्रेसमधून प्रवास करणारा कर्नाटकमधील ७५ वर्षीय प्रवासी कोरोना पॉझिटिव्ह असल्याचे उघड झाले होते. या बोगीतून रत्नागिरीत १५ तर कणकवलीत सहा प्रवाशी उतरले होते. कणकवलीत उतरलेल्या दोन जणांचे जिल्हा प्रशासनाने होम क्वारंटाइन केले होते. कणकवली स्टेशनला उतरलेल्या या प्रवाशांपैकी तीन प्रवासी पुन्हा मुंबईकडे माघारी गेले आहेत तर यातील एक प्रवासी आपल्या घरी होता. आरोग्य विभागाने शोध मोहिम राबवित या प्रवाशाची आई तसेच त्यालाही होम क्वारंटाइन केले होते. त्याच्या आईला खोकला असल्यामुळे तिला जिल्हा रुग्णालयात दाखल करण्यात आले होते. तपासणीसाठी पाठविलेल्या सँपलचा रिपोर्ट प्राप्त झाला असनू एकाचा रिपोर्ट कोरोना पॉझिटिव्ह आला आहे. मात्र त्या रूग्णांच्या आईचा रिपोर्ट निगेटिव्ह आला आहे. त्या रुग्णांवर आता जिल्हा रुग्णालयातील कक्षात उपचार सुरू आहेत. मात्र त्यास अद्यापही कोणतीच लक्षणे नसल्याचेही जिल्हा शल्य चिकित्सक चाकुरकर यांनी सांगितले.

जिल्ह्यात सध्या जीवनावश्यक वस्तूंचा पुरवठा सुरळीत असून परजिल्ह्यातून येणाऱ्या जीवनावश्यक वस्तूंच्या वाहनांना अडविले जात नसून त्यांना यापुढे पासेस देण्याचीही व्यवस्था करण्यात येत असल्याचेही जिल्हाधिकारी व जिल्हा पोलीस अधीक्षकांनी स्पष्ट केले. जिल्ह्यातील काही बँकांच्या एटीएममधून पैसे उपलब्ध होत नसून त्याबाबतच्या सूचना बँकांना करण्यात येतील असेही जिल्हाधिकाऱ्यांनी सांगितले.